AOC dak sentakba nung OKM-i takhangba asem agütsüogo

Mokokchung, Oct 7 (TYO): Mokokchung town kübok Süngkomen ward nung totzü ayokdak Ongpangkong Petrol Pump Co-operative Society Ltd (AOC) nung totzü litre tasazük shitak magütsür ta sür Ongpangkong Kaketshir Mungdang-i kuli kar puteta keno agütsüba dak sentakba nung Bodbarnü iba AOC-ji shibanga yuja lir.
Iba dak sentakba maparen nung Hokollbarnü OKM lennirtem den district administration nungi EAC R. Daniel Angami, PS-I OC inspector Longobou aser Legal Metrology & Consumer Protection Department nungi ketdangsertemi, iba petrol pump nung aliba koltem lapoka reprangdangba mapang tim masüba kuli kar nguteta, iba dak ajemdaker OKM-i Mokokchung D.C nem takhangba kar agütsüogo.
Tanü kol-tem lapoka reprangdangba mapang tengutetbatemji; mezüngbuba nung kol ka nung totzü agütsüba meter reading majungba ajanga totzü liter shitak magütsüba putet. Tanabuba nung Legal Metrology & Consumer Protection Department-i memeteti kol ka nung seal raksar aliba nguteta liasü.
Tasembuba nung; totzü agütsüba dispenser kol ka raksar aliba indoker tasen ka Legal Metrology & Consumer Protection Department nungi temelaba mekai parnok sasa melener aliba ka puteta liasü.
Item tengutetba dak ajemdaker OKM-i Mokokchung Deputy Commissioner nem takhangba asem (3) agütsüogo. Mezüngbuba nung; kol ana koba mejungi aliba putetogo, itemji yakta melentsüla kechiyong item kol-temji joko tejen asünung yanglushitsü majungtsü, ta tezüluba shiti nungji shia lir.
Tanabuba nung; shibai kolji temelaba mekai pei mulungka nung amshiogo, ibaji bushisüngdangtsüla aser aibelenerji tekaratiba nung aputsüla, aser tapet mapa inyakbaji nübur nem metetdaktsütsüla, ta OKM-i takhangba agütsüogo.
OKM-i agütsüba takhangba asembubaji; iba keno ya timi metembang tashi aser kol rakar alibatemji tasen memelen tashi, iba AOC ya melapoki atatsüla, ta parnokisa metetdaktsü.
Item tengutetba dak ajemdaker takhangba agütsübatemji tekaratiba nung bangdaki reprangdaktsünür, ta OKM-isa Mokokchung D.C dang mepishia metetdaktsüogo. Item takhangbatemji mataloktsüra, loktii mulungba ama tapet mera agitsü, ta OKM-isa metetdaktsü.