Aoer o jembir mali asü ?

Tang Nagaland tatar senden ( Legislative Assembly) nung Deputy Speaker Wb.Imtikümzük shimtetba tepela osang ka taoba Deputy Speaker Wb.Chubatemjeni tanü iba osangkaket Olemsabang nung lemsatepba onük nung ya  Nagaland kümer tang tashi nung Aoer rongnung Speaker ataba otsü mali ta metetdaktsüba jagi asenok ajak dang wadang tuluka sayur. Iba wadang nungji asenok Aoer dak aketba sempet aser tashi indang bilemdangtsü mapa ka angur. Atangji, ‘ Speaker’ ta asüba shitakba olong tetezüji asen oshi nung meyipra ‘ O jembir’ ta dang meyiptettsü. Ajisüaka, tatar senden nung ‘Speaker’ ta asübaji o jembir ta asüba dang nungi kanga agia tuluba aser taretba lir. Atangji, ‘Speaker’ asütsü shimtetsangji o jembi mashi mesüra o junga mejembitetba nisungbo kodanga meshimer, kechiyong tatar senden nung pai mesüra lai aiben jembitsüsa adoktsü. Aji oda, tatar senden nung ‘Speaker’ ta asübaji senden lenir mesüra mendenbuba mesüra mendenbula lir. Ibayongji, tatar senden nungbo prime minister mesüra chief minister dang nungia Speaker-ji tuluba aser temaba lir. Aji oda, senden nung o jembir ajaki Speaker nem aküm agütsür külenang jembitsü. Ano, speaker-jibo koba telok nungi südir süang, kodang speaker kümdir, pa mesüra lajibo joko ajak meyong, anungji yimten telok tsütsü atsünga mesüra tejak shija jembitsü makoker. Speaker menden aküm aser topur ajungji aji ka asütsü. Aji oda, iba ama aküm taket aser tongtibang menden ka nung Nagaland nung Naga nunger tatar yimsüsürtem rongnung Aoer katia tang tashi nung Speaker mekümtetba mesüra iba maongka magitetbaji tebilemdangtsü tuluka lir. Atangji, tang tashi nung Aoer Chief minister ana tashi inyaka aruogo, anungji Speaker mesüdangyonga iba jagi temulung asütsüa akok. Ano, asenoki angatettsü kaji state yimsüsüba menden nung temaba menden ana lir. Ana rongnungji ka Speaker-ji aser ka Chief minister menden asütsü. Anungji, Naga nunger kin onsara aser kin apia dang mendena alemer asünungji Aoer ka chief minister asüdang ano Aoer ka Speaker asütsübaji mesadem tuluka lir. Ajisüaka, kodaser tangar chief minister asüdanga Ao kin nungibo shingaia Speaker menden nungji mementet ta bilemer. Ano, Speaker dak aketba tashi tulukaji tatar yimsüsürtem rongnung mangatettep adoka sorkar anokshidang pa mesüra la dak tashi tuluka lir. Idangjibo pai mesüra lai tatartem senden züngsem nungia agientsüa akoktsüsa pa dak tashi tulu lir. Iba jagi Speaker-ji shiba südir süang par teloki aser balaka chief ministeri kanga temulung lemteta aliba nisungang shimer. Iba ama kulitem jagi, ashiko, asenok Aoer tatar yimsüsürtem rongnunga o junga jembitetter tsüngro tasong aser senden zepzep ta ketdangsütettsüsa sempet tajung aketertem liaka Speaker inyaktsüsa maongka mangu südi ta angateter. Atangji, Nagaland nung Naga nungertem rongnungbo jungang tejung, anganüang-tanganü,  temetetba aser tangatetba nung Aoer tama ta jembitsüsa Tsüngremi moatsüogo. Iba jagi tangari Ao kin dak nungi tajung imlaba tuluka lir. Tangar Naga kini Aotsür-Aoerbo ajak temetetter, tangatetter aser takar amai bilemer. Aji oda, Ao kin nungi adokba tatar yimsüsürtembo ajak tashitemeteter, takutet aser o jembi tashi aser tedangshi tesa amai bilemer. Asenok atema tebilemdangtsü wadang tulutibaji tangaribo yamaji bilemer aser imlar saka asenokbo tatar senden nung Speaker asütsü maongka mengutetbaji dang masü saka o jembir mali kümadokra Naga lima nung Ao yimli samar asütsü. Yimten mapa ya o dang lir, kechiyong o jembia telemtetba agibatem dang mapa küma inyaker. Aji oda, Naga nunger ajak tajung kümdaktsütsü asoshi Ao kin shimtet süra Aotsür Aoertemi tatar senden alidang aser malidang, tesem aser mapang ajak nung Naga nunger asoshi jembitsüla. Iba nükjidong aser khuret angateta Ao kin nungi tatar senden nung amenertemjisa o tajungba jembir asütsü nüngdaker.