Aongza Ward nung timlibalirutsü nükjidong yur telok ka tentet

Mokokchung, September 02 (TYO): Mokokchung Town kübok aliba Aongza Ward nung “timlibaliru” omen nung ajemdaker ward merükmejuba aser ibala mesüka maparen tapu balala inyaktsü asoshi ‘Socio Enviroment Management Board (SEMB)’ ta sür telok ka tentetba sentong ka Pongentola Govt. Middle School kilem nung agiogo.
Tanü iba sentong nung tongti tesemdanger P.H.E.D Mokokchung Division Executive Engineer, Er. Yanger Pongeni mapang tatsüka agia jembidang, bendangeri Mokokchung indang jembiba ya tongtibangsa town aser nisung merükmejuba indang bulua jembir, aji oda, tanüa kasaji asenoki town merüka yutetter asü masü, ta tasüngdangba ka mezüngbuba agütsü.
Tsüngremi alima tobur junga yanglu aser meimchir nem kechisarena madak tim ketdangtsütsü aser anepalutsü nungloktsü, aji oda, shitakba bilemdanga ora merükmejuba maparen yabo ozüng tesashi yanglua senchi achitsü menüngdaker, saka ibai asen tata teinyaktsü lir, ta paisa ashi. “merükmejuba ya asen yimya aser sobaliba ka kümdaktsütsüla”, ta paisa shisem.
Aongza nung iba telok tentetba ya nükjidong tulu yur tenzüker aser iba mapa ya kanga tulu asünung, kija aser kibong shiai iba nükjidongji kanga junga angatettsüla, aji mesüra, asenoki alizüngji metongtettsü, ta paisa ashi. Paisa melenshidaktsünüba o ka bener arudang, “koba mapa südir süang, temelenshiji pei ateptsüng nungi tenzüktsüla”, ta ayongzüka ashi.
Iba ama mapa ya Aongza nung dang masü saka Mokokchung Town ward ajak nung tenzüktsüla, ta paisa inyakdaktsünüba o ka shisem.
SEMB tentetba nükjidongji tongtibangsa; Aongza sanger shia pei taküm, kibong, kishikinar aser lokti asoshi khuret akaba senso kaka asütsü, pei alidak aser temeket merükmejutsü, ki-o-jen yanglubatem, lenmang ayuyim agi lokti nem timtem magütsütsü, kilentzü/ayong merüka aser kümzüka ayutsü, alijak tobur jung ayutsü, gari amshiyim aser ayuba agi kiyonger timmetemdaktsütsü, nüngdakba tesayuba sentong mapang shia ayonga akatsü aser shiruru ozüngi melaba ama timi metsüba, item teinyaktsütemji densema lir.
Tanü iba sentong nung Ao Senden tir & Swachh Bharat Mission Ambassador Wb. Imliyanger Jamir, All Ward Union Mokokchung Town tir Wb. Ayim Longkumer, Mokokchung Municipal Council Superintendent Wb. Pangjung, Aongza Ward Chairman Wb. R. Longritemjen Ao aser tangartemi tepela o den tayongzükba o tulu bener arua tesentepertem ayongzüka liasü.
Iba sentong Mokokchung Town Baptist Arogo Associate Pastor Wb. Temsüwati Kichu den temoatsü meshia sarasademer tenzük aser Mokokchung Revival Church (CRC) Pastor Wb. Daniel Jamir den tenüngsang agüja sarasadmer tembang. MTBA Aongza Youth Fellowship-i ken tajung ka tena tesentepertem lemsadaktsü.