Aonokpu nung tammang anogo bilemteta amung

Aonokpu, Oct 5 (TYO): Aonokpu lima nung October 5, 2017 anogo ya tamang aser tejashi anogo ka ama bilemteta amongba mulungku sentong ka tanü October 5, 2018 nü Aonokpu yimtak Aonokpu Senso Mungdang-i ayongzüka mungogo.
Iba sentong ya kidong tebou ka semchir nungi telok kadi yaküm küm October 5 nü yim anema tashiyim mapa tamajung inyakba asoshi tejashi sayua amungba ka liasü.
Hokolbar nep 6:00 ako nung Aonokpu yimdak community hall kima nüburtem adenshia sarasadem mapang ka agir yimdong süa miyo-miyoa jajaa Atu-Yimrong tashi tur, ano yangji sarasadem ka agi aser iba nung jagi Aonokpu Baptist Arogo sentep kidang arua idakjia sarasadem sentong ka ayonga agir, ano community hall-isa meyipa arur yangji lokti senden ka agia liasü.
Tanü Aonokpu yimdak tesem balala nung, “Ayaterem nung yimten nashi lepseter merenshia yimsüsür nem remdaktsüba, yimmaker telokji alimai aitsür”, “Ayaterem nung yimküm rakzüktsü merangertemi yimsüsür aser arogo tenzükertem ki kakpoka tur ki oset raksatsüba aser bomb poka nisung dak taochi maka azükba mapa tamajung sashisashia aitsü” ta asüba taitsüba o balala sü nung zülur idaka yur liasü.
Oct 5, 2017 nü yimden anembonga aliba mapang ka, Aonokpu nung kidong tebou ka semchir nungi telok kadi ayaterem nung tashiyim agi yim nashi tepsetba den yimsüsür aser arogo tenzüker ki kakpoka tur amokmerena kiojen raksatsü, aser teka sangshia nisung yirutsüba indang tenük kuli alir aser tatalokbatem lokti senden nungji nisung balalai lemsatepa liasü.
Iba sentong nung kuli agütsürtemji Aonokpu Council Chairman Ayutemjen, Nüngsentiba GB, Tekasashi GB, yimsüsür T. Anungba, yimsüsür Alemmeren Longkumer, T. Lolen Longchar deacon, A. Imti Longchar (Arogo Kimen) nungertem liasü.
Iba mulungku/tammang anogo ya tongtibangsa yimmaker mapa aitsüba den yimertem nungi iba tetsübutsü mopungsem agientsü aser tanaben yimjung bener aruba den sobaliba aser loktiliba sümedema aotsü, putu menden meshiteta Tsüngremer taochi aser temoatsü meshia, ochiba ajungketa aser tarutsü nung iba ama mataloktsüsa yim kümzüka ayutsü, aser yim tashi itta nübur telungjem asentenshia tarutsü lanu putu mapa ajak nung terenlok akatsü teimla yur iba sentong ya ayongzük, ta Wb. A.R. Wati-i jembidang metetdaktsü.
Iba sentong nung Aonokpu Baptist Arogo nung sannüker, Rev. M. Tongpang-i Tsüngrem o jembidang, meimchir ya arishi tatsü lir, aji oda, ali rongsen den tashi temetetba aser jenjang tulu ajangzüktetaka, Khrista mekara aser tanela kümzüka melira ajakji amajok dang asütsü, anungji, pei temenen nangzüka memenudangsa Khrista bushia Pa nem bendanga agütsütsü asoshi tayongzükba agütsü.
Iba sentong nung Aonokpu Senso Mungdang tir L. Akümba Longchar den I. Lanu Longchar (Putir) aser Er. Chubatoshi, Er. Imyulangba Ao nungertemia shilem balala agia tesentepertem ayongzüka liasü.