Aonokpu Village Council züngsemtemi asür lanur ana nem akhüm agutsü

February 10, 2017 nü Kohima nung Aonokpu Village Council züngsemtemi asür Khriesavizo aser asür Bendangnungsang na leper nung asürtem nem akhüm agutsüba noksa nung angur. 

Kohima, February 10 (TYO): Tanü Kohima nung Aonokpu Village Council züngsemtemi asür Bendangnungsang Longkumer aser asür Khrievizo Metha na aremba leper semdanga tena nem akhüm agütsüogo. Asür Bendangnüngsang ya Aonokpu nunger liasü.
January 31, 2017 aonung Dimapur nung police-i injang yokdang Naga nunger lanur ana ya kahseta liasü.
Tanep Aonokpu Village Council züngsemtemi Kohima nung Zonal Council Hall kübok tena aremba leper semdang, aser iba mapang Aonokpu village council züngsem kati, “Tena asübaji amajok masütsü, kechiyong Naga nunger atema tenati taküm bendanga agütsüogo,” ta ashi.
Ano külen village council züngsemtemisa APO, AYO, tribal hoho ajak aser nüburtemi lanur ana tasümang tajungtiba nung anepaluba atema pelaba metetdaktsü.
Village Council Chairman-i, “Nüngdakaba maparen ajak inyaktsüji onok teinyaktsü mapa süaka village council tonga marudang tribal hoho temi teinyaktsü ajak inyaker liasü,” ta ashi.
Paisa, “Lanur anati taküm tenla agütsüba ajanga Naga nunger tsüngda, talisa Angami nunger aser Aoer tsüngda tesendaktep tashi taitba akumtsü, aser tarutsü anogotem nunga maneni longjema alitsü,” ta metetdaktsü.
Village council züngsemtemisa asürtem aremdak naro yutsüba den külemi asürtem bilemteta telok sarasadema ka agia liasü.