Aor aser Naga kin telungjem aser terenlok asoshi OM-i nungittsü

Mokokchung, Jan 30 (TYO): 59 buba Ongpangkong Mungdang (OM) lokti senden January 29, 2019 nü Mayangnokcha Govt. Higher Secondary School Mokokchung nung takok ngua mungogo aser iba senden nung teloki inyaka aotsüba bangzüng kar renema yuogo, ta OM tongti zülur Wb. L. Bendangwati-i osang ka ajanga metetdaktsü.
Item bangzüng rongnung mezüngbubaji; Satsü Village Council-i asüngdangba ama, tanü nungi Satsü yim ya Ongpangkong Mungdang nung züngsem ka asütsü agizüka ayu. Tanabuba nung; Mokokchung district nung “sports complex” kabo alitsüla ta reprangateta, iba dak sentakba nung OM-i yimsüsürtem den tongtepratepa sorkar den jembitsü renem.
Tasembubaji; Ongpangkong yimtem nung nübur rongsenkettsüng renloka aotsü nükla nung “Income Generating Schemes”, talisa livestock aser agricultural cultivation nung OM ajanga village council den teka amteper inyaktsü lemtet. Pezübuba nung; Aor aser Naga kin telungjem aser terenlok maparen ajak nung akokba tashi OM-i nungita yaritsü lemtet. Pungububa nung taoba bangzüng merenemjemi alibatem ano maneni inyaka aotsü lemteta yuogo.
60 buba OM item lenisüba nung anir aotsü (2019-2021); Tir- Wb. Tsüktimeren (Khensa), tatong tir – Wb. Imlikümzük (Mokokchung), tongti zülur – Wb. Aso Imsong (Chuchuyimpang), repsem zülur – Wb. Süpongtemsü (Aliba), sen zülur- Limawati (Meküli), sen repsem zülur – Wb. Rongsenlemba (Ungma) aser kimen – Tsüinsangba (Longkhum) parnok shimtetogo, ta OM tongti zülur Wb. L. Bendangwatiisa metetdaktsü.