Aor asoshi tebilemtsü

Taküm election nung Nagaland kübok tesem kar nung Arrla 144 CrPC ozüng agütsütsüsa tensa ajurua liasü saka district ajungalen iba ozüng alitsü agütsübajibo Mokokchung district nung dang liasü. Iba ya asenok Aortem asoshi tebilemtsü ka lir aser asenoki kanga junga shisadangtsü nüngdak, kechiyong ozüng amertemi district ajungalen iba ozüng alitsü agütsüba ajanga asenok Aor dak lendong keta lir ta züngshiba aser arentaka bilemba sayur. Hao, asen district kübok yimtsüng aser tesem kar nung party balala pusemertem tsüngda rarabangsen adok aser tia maka nisung taküm-a ka dena laluogo. Ajisüaka, district ajungalenbo tensa mejungi maküm mesüra election dak sendakba lendong-tsüdong kecha matalok. Mokokchung nung dang masü saka tanga district tem nunga kasa mepetmesü ataloka liasü saka parnokbo lendong atalokba tesemtem dak alaka district ajungalenbo curfew alitsü ozüng magütsü. Ya kechiba ta asenoki khen shisadangtsü nüngdak. Naga nunger rongnung Aorsa tangar ajak dang nungi tejakleni aoba kin ka ta züngshir saka ano tanga kin ajak dang nungi asenoksa tamajungba ta züngshibaji maaksü ulura lir. Ano, tebilemdangtsü kaji ozüng amertemi Mokokchung district ajungalen curfew alitsü ozüng agütsür ta sangdongdang Aor tanishir mesüra telok shingaia ajibo tim masü ta ola madok. Tanga district kar nung iba ozüng tu agütsü asübo ola adokla aser lendong atalokba tesemtem nung dang ashi district ajungalenbo curfew malitsüla ta anema noktakla. Ajisüaka, asenok Aorbo iba telemtetba anema noktaker mesüra ola adoker shinga melii dang süidaktsüogo. Ashir dang ashi nisung kar majung nung nisung ajak majung ta züngshibajibo tim masü aser shitakba agibo curfew alitsü ozüng agütsüba anema ola adoktsüba asü. District ajungalen curfew alitsü ozüng agütsüba ajanga election ya Aortem atemasa tamajungtiba ta tangar dang sayuogo aser iba atema tangar dang nüma metangteter. ABAM-i anir Naga lima nung Clean Election mapabo kanga meranga inyaker saka ano külen election nungbo Aorsa tamajungbaji tenokdangba agütsüdi ta asübaji khenyongi meputep. Asenok Aortem saksalemtsü mapang ka tongja tongogo. Mezüng Osangtajung angashirtem aser Khristan yimsü agizüka amangertem ta tangar dang lia sayutettsü atema asenok tangatetba melenshitsüla. Aortemi election kangasa mashileni angateta inyaksangshia arur aser iba jagi dang tangari asenok dak lendong keta lir ta ser ozüng tesashiji agütsü asütsü akok, saka asenoki iba tenüng tamajung ya agientsü atema merangdi arungma. Asenok Aortem asoshi osang tajung kaji, taküm election ya tesüiba election tem ama masü tajungba nung agitetogo. Iba ya Clean Election indang tajangzük lir aser asenok rongnung kar majungba dang ashi, teimbakati election nung ochishia shilem agitsü angateta shilem agiba ajanga petsaprong mesüra lendong-tsüdong balala madoki süiogo. Talisa Longpa yimtsüng nungbo polling station kima vote agütsürtem ken tentepa kazüba video ka angudang temulung nung kanga kongshiogo aser nisung ajaki election ji yamai angateta shilem agi nungbo, benjung tulu rongnung ka asütsü ati ta kanga dang temulung chia reprangogo. Anungji, arungma asenoki dang melenshidi ta serbo Tsüngremi yaritsü mulunga dang lirko. Aortem arentaka mesüra temulung ila melili, Tsüngremi asenok kanga meimer aser Pa taochi asenok madak mesamai lir nung kodaser asenoki tsürema bilemer aser atidaker. Tanü nungi tenzüker Ao lima nung curfew ozüng magütsüdaktsütsü atema asenok ajak nisung tajung ka ka kümdi ni ta ayongzüker.