Aor chanu jilushi nung nüngtugu akümer

Dimapur, May 15 (TYO): Asenoki aiben Tenla kidang mesüra lokti sentepdak jilushi (drama & skit) aiba repranger aser temoatsü angur. Item jilushitem ajanga asenok kija taküm, kibong, lokti, yimten aser Arogo tensa tia sayur aser jembir. Iba amaji jilushi yagi nübortem jaklaliro aser libaliro melenshidaktsür.
Tanü putu nung balaka jilushi aiba mapa nung ya mongin süa inyaktsü asoshi Drama school nung azünger aser item school-tem rongnung National School of Drama (NSD), New Delhi ya nüngtugu reju ka lir. Taküm February ita ka nungi 21 tashi New Delhi nung 18 buba Bharat Rang Mahotsav (International Theatre Festival of India) sentong aliba mapang nisungtemi jangratema reprangba jilushi kaji Khensa nunger Wb.Temjenzüngba Kichu-i apiteta yangluba aser sayuba jilushi (play) ka tenüng agi “Taküm junga alidak lima ka,” (Land where Life is Good) liasü. Iba jilushi ya NSD nung nüngtugu jilushi zülur, Asif Ali Haider Khan-i zülutsüba liasü.
Iba jilushi repranger Naga nungertem rongnung Delhi nung alir, Wt.Atula-i ashiba agi, Delhi ama kin tapu aika alidak bendang lima ka nung alidang, pei sobaliba jungjunga meteta liaka tangar den külemi libaliroa aodang pei sobaliba mesendoki aotsübaji aiben kanga nüngdaka bilemer. Iba ama mapang ka nung, Wb.Temjen Kichu-i apiteta yanglua sayuba jilushi jagi  Naga nunger taküm ka putu balala ajanga tangar den sobalibaa otetba mapatem shitakba nung atalokba repranger amai sayuba ajanga kanga nümadanga aser temoatsü ngua reprangogo.
Iba jilushi nung Naga nunger tebur chanu ka  tenüng agi Takoba den par azü tajung ka aser ainketer medemer ka tenüng agi Nokzenba adoker. Kodang Naga limai Yisu yimsü aru, idangji Takoba ji temulung meyipa Khristan aküm aser pa tenüng Peter ta melen. Iba ama tamangba yimsü tasen den pei sobaliba meyokteper ooya aliba mapang ka ano alima nung tatalokbatem ajak ngua metettsüsa television aru, anungji India nunger tamangba yimsü dak keta aliba Ramayana nunger otsü dena paia meteta aküm.
Iba ama khen nung temelenshi aika pa taküm nung ajurudang, Peteri pasasa paji shibar tejangja bushitsü atema par yimtak nungi Rajpath-i apuso. Iba mapang pai tesem ka nung Hornbill festival lia ajuru aser yangji yartsüngsangertem den külemi tsüngsangtsü lia ano külen Michael Jackson ola agi pa atsür ao. Iba ama terata tia ka nung pa Rajpath atongdang yangji India nunger Republic day amongerba linük nisan atsüketa liasü aser India gate nung state shia nungi telok telok arua pei sobaliba yartsüngsang sayua liasü. Iba mapang pa par azü aser ainketsang medemer na den pilaa adok, kechiyong Naga nunger züji India nunger sepaitemi anishiba azü tulu den meputep liasü. Idakji pai television nung angusang Hanuman ajuru saka paji jilushi aier nisungang ka liasü. Idangji, pai Hanuman aisang nem tenem  ozü züng ka agütsü aser Hanuman aisangi pa nem ‘ shitsü (hanuman) teben’ ka agütsü
Iba jilushi nung Takobai aniba azü aser par medemer ainketer Nokzenba na  jagi Naga nunger sobaliba sayur. Iba jagi Takobai tangar ajuruba mapang azü o Nokzenba naji aiben mali aküm. Iba amaji asenok bendanglen lia aodang tangar sobaliba nem asenok kokdaktsür, saka asenok sobaliba meteta tangar dena liromedema otettsübaji tongtibang lir.
India nung kin kidong aser oshi aika alinungji jembiba agibo mangatetteptsüa akok saka Temjen Kichui sayuba ama jilushi ajanga kin kidong, oshi aser sobaliba ajaki angatetter aser Naga kin sobaliba indanga metetdaktsür.
Naga nungertemi dang masü saka iba jilushi ya tangar aikati kanga sapua repranger.