Aor government tenüngji putu menden

Dimapur, August 1 (TYO)  : Naga kintem rongnung Aor kin ya tulutiba ka ama züngshir aser putu yimsüsübarena tangar kintem dang nungibo kanga agia tajungba lir, iba jagi state sokari Nagaland Village & Tribals Council  Act 1978 ya Aor putu menden yimsüsüba nung ajemdaker Naga kin ajak asoshi latet, ta Tir Yimyim yimozülur, Wb.K.Temjen Jamiri metetdaktsü.

“Asen Aor putu yimsüsübaren nung nisung kati mesüra kin kari mulungba nung dang masü saka putu mendeni mulungba nung temzüng ozüng azünger aser amongtsümong anogo lateta sobaliba arur,” ta paisa tanü yangi Aoyimti, Dimapur nung Tsüngremmong anogo nung ‘Sobaliba Asüngsashi’ sentong nung ” Aor Putu Menden aser Council Act” onük nung jembidang metetdaktsü.

Aor government tenüngji “putu menden” aser iba ya tematiba yimsüsüba menden lir. Iba menden alema Aor temzüng ozüng yangludak, nübortem asoshi telemtetba agidak aser obendangdak mali. Putu menden nem nübortemi tashi ajak agütsür aser idakji kin kidong shia nungi yimsüsür tazüng nungi talak tashi abensaa mena lir, ta paisa ashi.

Nagaland nung kodang Nagaland Village & Tribal Council Act 1978 ya latet, iba ozüng ya kin ka asoshi dang masü saka Ao kin putu menden yimsüsübaren ajizüka Nagaland nung aliba yimtsüng ajak nung kasasa benshitsu asoshi ozüng küma latet, ta paisa metetdaktsü.

“Putu menden ta asüba o Village Council ta asüba na tetsüngdaji, putu menden yimsüsüba nung tsürabur mapang nungi tanü tashi munglungzung o agidang yimsü süa arur saka tanü putu nung tentetba aser latetba Village Council yimsüsübaji tezüluba nung ozüng küma latet lir.  Ajisüaka Council Act yagi akhi tsürabur mapang nungi amshia aruba putu menden yimsüsübaren nung kecha nunga timtem magütsür saka putu den apet tatartem nem pei yimtsüng nung terenlook mapa tapu balala inyaktsü asoshi tashi aser maongka agütsür ta yimozülurisa metetdaktsü.

Iba kasa sentong nung Assistant Labour Commissioner, Dimapur, Imlisashi Jamir-i “Kiba lenbu aser jaya jako” onük nung jembidang, asen Aor kibalenbu sobaliba tejangja kong nungi koda tenzük bushidang asenok ajaki Longterok aser Chungliyimti otsü mamatoktsüla, kechiyong asen kin, kidong, sobaliba, jaya jako ajak tamendakdak yang nung jagi tenzük aser tanü tashi iba tsungsü nung asenok sobalibaa arur, ” ta metetdaktsü.

“Kiba lenbu nung kin kidong telemsaji tongtibang lir. Kin kidong kasa tetezü azü ka, tebou aser tebu ka dak nungi jakzükbatem, anungji parnokji kasa zü asünung itemji kibalenbutepra nüso, techitenu chirnur tajung mesotettsü, iba jagi yimteni kasa kin o kina melembutsü ozüng agütsü,” ta paisa metetdaltsü.

Asen Aor sobaliba nung kati ka dang tenüng metetshii akümtsübua tajayim shitak ajaba ajanga tesendaktep temeim tali akangshir aser tangar dang tesendaktep kuli sayur ta Wb.Imliisa metetdaktsü.

Iba kasa sentong nung Tsüngremmong raratet ashidang, ” Tsüngremi meimchir nem moajen moaja arur külen Pa tenüngsanga amongba dang Tsüngremmong ta ajar,” ta T.Bangerlobai metetdaktsü.

Tanü iba sentong tenzüka Aoyimti Baptist Arogo sannüker Temsu Jamir-i sarasadem aser Aoyimti village chairman T Lima Pongen-i telok pela agizuka jembi. Kasa sentong nung Aoyimti Watsü teloki Elangtsür ken ka aten aser tanurtem o kaketshirtem nati Tsüngremmong ayongzüka tsüngsanga sobaliba ken aten. Tatem nung Aoyimti Senso Telongjem nung tir Wb. A.Achi Jamiri sentong nung shilem agirtem ajak dang pelaba metetdaktsü aser Wb.B.Rongsen Aieri sarasadema sentong tembang.

Aoyimti nung Tsüngremmong amongdang inyakba tongtibang mapa kaji Aoyimti Ao Lanur Telongjemi  sentong tenzük dang aser tembang dang süngkong tema liasü.