Aor kentenertem

Tsüngremi asenok Aortem nem lemzüktsüba sempettem aika rongnung tajung kaji kententsü sempet agütsüba ya asütsü. Ken ajanga kin ka nüngtugu akümba, oshi renlokba aser nisung mulung sünepja peladaktsübaji tesüngmangtsüka lir. Joko, Aotsür Aoertemi atenba ken kensep aika adoka lir. Item kentem mejemba aser atenba sempet aser temoatsütemji bilemdangra atamata temoatsü masü. Itemji kin ka rongsen anungji asenoki retreta agitsüla. Atangji, tanga lima nung tangar oshi nung atenba kentem asünungbo, tanü Nagaland nung Ao ken atenertem ya alima rongsen nunga kanga takar kümer alitsüba purtem lir. Ajisüaka, tangar den medemdangra asenok ya alima tila aser nütsünga aika masü, ano iba denji asenok aikati asen oshi mejangrar asünungji asen oshi nung atenba kensep alia mangar, ibayongji asenoki atenba kentem ya jenjang makaba sempet ka ama kümadoker. Iba tia nung jagi asenoki memenudang asenok nem Tsüngremi ken mejemtsü aser ken atentsü sempet agütsüba ya shia arudaktsütsüla. Yakonung, Honibar aonung Dimapur nung Aor Lanur Telongjemi ayongzükba kenten sentong nung Aotsür Aor kentenertemi peisasa ken tajung mejema atenba angudang aser angashidang kanga jangratema angaogo. Item ama ano Aotsür Aor kentener tajung aika lir. Item jagi asen kin sobaliba, asenok yimten, loktiliba aser tanülaren jenjang kuli agütsür. Asenoki asen putu ya junger majunga ta jembibaji masü saka tanü putu nung kentenertemi kechi komala ken atener ta asübajiang kanga tongtibang lir. Aji oda, tanü putu nung kentenertemi ochimashiba aser Tsüngrem nungi pilaba nübortem tia indang tenra asen lima aser nübortem tiaji aji asütsü, kechiyong kenjibo nisung bang agi atener saka kensü aser ojang ajakji Tsüngremi agütsür. Tetezü, ken ya asenok o Tsüngrem na tsüngda o belenba lenmang ka lir. Item tagitsü jenjangji angateta asenoki asen oshi nung kentenertem ya ajungshitsüla. Aji oda, asenoki mapang mapang shia asen oshi nung atenba kenten sentong ayongzüka akatsüla, tenla kidang akok tashi asenoki asen oshi nung dang ken atentsü ajungshiteptsüla aser Aor kentenertemi atenba kensep alia item kentemji sapua angatsüla . Talisa, tanü tensa kidang kibong aika nung tanurtemi asen oshi angazüktsü mejangrar, iba jagi tangar oshi dang jembir, ajisüaka asenoki parnok nem asen oshi agi atenba kentem angatsü yimya sübadaktsüra, iba jagi taküm tajung küma melenshiba dang masü saka memeteti pei tetsü oshi jembiadoktsü. Ashiko, Naga nunger kintem rongnung pei oshi nung peisasa ken mejema atenertem rongnung Aor tama asütsüa akok. Akhidang, Ao ken temenungratsüka tena angashibaji arem nung linük tenzükertemi mejemba pei linük aser pei nübortem meimba kentem, nüknarar ken aser aluyimertem kentem liasü. Tanüa item kentemji shilua asentenshidakja atendang, temulungjang nung kanga kongshir aser memeteti pei senso lima aser nübortem meimtsüba shisatsü ka aitdaktsür. Tanü asen loktiliba nung asen oshi nung mejangrai akümba dang masü saka pei lima aser nübortem asoshi bendanga agüja inyaktsü tejangraba aser tangatetba mali akümba ya, asenoki asen oshi nung atenba ken sendoka endoker tangar bendanger ken tetezüa junga memetet ser jangrabangraa angatsü aser atentsü tenzükba nungi atalok südi angatetter. Asenoki English nung atenba kentener telok, tatishitsü agi, CCR, Beatles, Eagles mesüra Smokie teloktemi atenba kentem kanga jangratema angar saka jangratema angaba dak alaka asenok taküm sobaliba nung tagitsü aser temoatsü angubabo mali. Itemji asenoki asenok jangratemtsü kisüng indang bilema inyakdang memeteti takoksa anguba mapatem asütsü. Tanübo alima ajunga nung pei lipok, pei oshi aser pei ken wazüka ayutsü merangtepba mapang lir. Iba ama mapang ka nung asen kin nungibo kentener tajung paikaya adokba ya Tsüngremi asenok nem moatsüba temoatsü talila tuluka asütsü. Item kentenertemji asenoki asenok asoshi temoatsü aser rongsen ta züngshia o nung aser mapa agi ajungshidi. Ibai akok tashi Ao ken tasen tasen teimba-teimba mejema atentsü aser akhi tejen kentema mesamadaktsüi temenungratsüka shia arudaktsüba asentenshi mapang ka asütsüla. Idakji asenok ajaki pei pei shilem agidi.