Aor Kidongren aser Kibalemburen

– T. Bendangwati Pongener
Ex- Tatar, Mokokchung Village.

Yangi asen Ao kin dang kangasa nüngdak asütsü ta bilem nung tsürapur nungi jembia angazüka aruba sobaliba otsüren iba ocet ajanga lemsateper, tazüngeri kanga dang aroka shisadanga züngdaktsünür.
Asen Aor sobaliba ya kanga tajung aser tepented. Iba kübok Ao senso ka pa/ la taküm tazüokba nung lia aor aser pa/ la tanur asüdang nungi kibong kümer sülen-a sobaliba nung amendaker liyonga aor. Saka mezüng buba nung meimchir ka takümji na kechi kidong ibaji kanga tongtibang. Tanü asen Aolima nung reprangdangra kidong mepentet aika pei ajong asaa kidong mejangjai kiba lemputeper. Iba ama mejangjai kiba lemputepba agi asen Ao lima tarutsü   lanu putu jenjangji kidong mepentetba kin ka akümtsü lendong ana nung angur.
Asen Aori ya angateta benshi nungbo kanga ajungtsü südi ta bilemba otsüla oboula nunger Chungli yimti lima alidang , Chungli shilu, Mongsen shilu Külemi dang lia aru ta otsüla, oboula nunger nungi angazüka aru. Aor dang süaka shilu anaji külemi lia aruba tanü tashi Ao lima yim aika nung Chungli, Mongsen ta mepu balala nung oshi, yimsüsübaren, achiajembaren, sübosülemtsüren, jayajakobaren aser yamaji kidong nüngja balala pentetpenteta aru.  Chungli shilu kidong asem, Pongener kidong, Longkümer kidong     aser Jamir kidong, aser Mongsen shilu kidong pongu, Imchen kidong, Longchar kidong, Walling Kidong, Kichu kidong aser Sor kidong. Item kidong ya Chungliyimti lima nungi külemi dang Aonglenden lirang iba nungi Koridang tashi arur, tanü tashi Ao lima yim aika nung shilu ana ya lia arur.
Aor sobaliba nung aliba kaji Aokin nung shilu ana, Chungli shilu, Mongsen shilu ajaki metet. Chungli shilui Mongsen shilu mekümtettsü aser Mongsen shilui Chungli shilu mekümtettsü. Anungji kidong otsüren nung Chungli shilu, Mongsen shilu meyoktepba otsüren mejembitsüla. Au  shisakaribo otzü karbo pei ajung asaa melenshitsü akok, saka kidongbo kodanga melenshitsü makok.
Otsüla oboula nunger otsü ajanga angazüka aruba agi Chungliyimti lima nungi külemi dang Chungli, Mongsen mepu balala nunglia aru ta angazük. Keyi, pongzü asadang aser yim nübodok, maparen ajak nung Chungli, Mongsen lemsar wadang balala nung noktaka yim maparen ajak nung takok ngua aru ta otsü ajanga angazüker. Par putu nungbo Chungli, Mongsenji pentet penteta lia aru ta angazüker.
Chungli yimti nungi Aonglenden, Koridang tashi Chungli aser Mongsenji benteta aru ta otsü ajanga angazüker. Lia arudang tanü asen tensa nung putu ishika temalen Chungli aser Mongsen shilu ka dang meyoktepa jembia kümtsüba ajanga tanü asen Ao lima nung kidong mejangja kiba lemputeper.Item amala sobaliba nung mejangja kiba lembuba  ya, Aor Tata tainertemi tanü asen sobaliba ya ochi shia mejembira tarutsü asen Aor sobaliba tajung ya tangar kini  pungpapungpa dang reprangtsü südi ta kanga dang sasaseta aria bilemer. Tanü asen Aor meraket O kaji, Aorji ochi shir kin ta tangar kin tanga nüma danga jembir. Saka tanü asen Aor jenjang reprangdangra ajaki temulong nung bilema alibaji Aor dak ochi alitsüla, tenük merem malitsüla, ochi mashi aser tenük merem shir dak ketdir, iba kinji takoksa tiai aitsü ta metet nungji ochi maparen jembia Ao senso nütsüng nüburtem anitsü mapang agi tongogo ta ayongzüker. Aori metettsü kaji Chungli shilui Chungli O jembir, Mongsen shilui Mongsen O jembir, süra asen Aor tashi temeteteria ya tebu ka aser tetzü kati asoba par chirnurtemi koda sür kati Chungli O jembir aser kati Mongsen O jembir, tebu ka chir O balala jembitsüba küli mali sür Chungli shilu aser Mongsen shilu ka kümdakja jembiba jagi tanü asen Ao lima nung kin kidong mebentet Ao yim aika nung jembia arur. Ya kodasür jembir aser koba ajanga adoker Aor ajaki ken shisadangtsü mapang ta bilemer.
Asen Ao sobaliba nung kanga dang tajung kaji pa/ la kidong tejangja sür koda masü pei taso yim toktsür Ao yimtsüng ka nung alitsüsa adokra/ kümra, iba yim nungji pa/ la kidongji lira tejangja kidongji ka tebu ayimtsü.
Tebu ayimba nung shitakba kidong tejangja lira iba kidongji ayimtsü aser maliyonga tangatetep nung tanga kidong asüyonga ka ayimtsü. Joko pai/ lai par kidong balala asüyonga tebu yima tokji parnok chirnür tsüngda kiba lempu mesüteptsü/ masütsü saka iba jagi tanga yim nung mekongshitsü.
Tanü Ao lima nung tebu yimtepbaren nung asen otsüla, oboula nungeri benshia aruba sobaliba inyaksangshi tajung lir sür nung pei ajung asaa dang asüng kechi tia aitsü sobalibaji mangateti dang tanü lanu asensor jenti kiba lemputeper. Iba yagi asen Ao sobaliba dang raksar masü, saka loktiliba ajak nung timtem adoktaktsüba aiben ataloker taji,  yim shia nung tanü shirnok tata tainer menden sabang nung mena lir, tarutsü lanu putu mechi ken arokaroka shisadanger ochi agi nangri kanger, otsüla, oboula nunger nungi jembia aruba ama Chungli, Mongsen shilu ana kenyongi  balala  shitettsü tim, idangjiang asen Ao lima sobaliba ya tali mera keta aotsü südi ta bilema iba ocet ajanga ayongzüker.