Aor kilem

Ao kin asoshi kanga nüngdaka aliba yimkong ki ka  yangerteta mesemtetba ya Aor ajak asoshi aküm aser takok tuluka asütsü. Aji oda, shirnoki iba ki yanglutsü asoshi apiteta yangertetogo aser shirnokisa tenla tajung agüja yaritepogo, parnok ajaki Ao kin asoshi mapa tajung inyakogo, anungji parnok nüng asangtsü tim. Atangji, ibai Aor kilem dang masü saka Aor salang asütsü. Iba salang nung Ao kin asoshi dang masü saka Naga nunger ajunga asoshi tebilemtsü onük benoka jembitsü. Aji oda, iba salang ya Tsüngrem nungi shisatsü angudak aser ochi telemtetba agidak tesem ka asütsü teimla tulu lir. Tanü putu ya ochimashiba putu anungji tebilemtsü aika agi sünga lir. Item tebilemtsütemji jembir mejembima aser repranger mereprangma, anungji tebilemtsü nem asenok anishidaktsüra asenok tebelembo kanga belemtsü saka tatem nung teinyakmong makatsü. Iba amaji asenok lokti tentet nung inyakertem taküm aika taküm tepiyong lokti asoshi dang inyaka aru saka meyipa reprangdangdang teinyaktetbabo kecha maka, tesayutsü maka, anungji tejembitsüa maka amajok nung mapang endok amai akümer. Tang Ao Senden yabo yamaji mesüdaktsüner. Aji oda, Ao Senden tenzüker küm aika arur saka tangang talitsü ki ka yangerteta mesemtetter asünungji, ano tangang Ao Senden tenzüker ama Ao Senden lenirtemi Ao kin asoshi dang masü saka Naga nunger ajungtsü asoshi bendanga agütsüshir yimten aser lokti tenzüktsü teimla tulu lir. Aji oda, tamalen shisemba ama, asenok yabo tebilemtsü nem anishidaktsür masü saka tebilemtsü marudangi nübortem nem lenmang tajung sayua anitettertem asütsüla. Joko, Aor dak jakla tamajung aliba mejembii, jakla aser mapa tajung reprangteta jembimesotsüla, kechiyong asenoki tamajung tsütsü atsünga jembira asenoki asenok ajak ya tamajunga ta bilemtsü. Iba jagi asenok tangar tsüngdang nümamedangteti kümadoktsü. Ajisüaka, kodang asenoki tajung inyakba aser asen dak aketba jakla tajung indang jembidir, memeteti aser meteta asenok jungadoktsü. Iba ama shisatsü tesadem asee tesangwa nung asenoki asen salang ya Nagaland ajungtsü asoshi jembidak sabang ka kümdaktsütsüla. Tamalen iba yimobilem nung lemsatepba ama, tanü Nagaland nung Naga nunger asoshi teinyaktsü tongtibangtibaji yimten tebilemtsü ya telatetba ka dangi arutsüla. Atangji, ibai mapa kanga tasak, iba jagiang mapang agir. Ajisüaka, asenoki tanü putu tensa aser asenok tia jungjunga meteta ken o jembi tenzükra, asenoki asenok tebilemtsü ya melamelaa koka jembitettsü. Naga yimten tebilemtsü aliba agi Nagaland nung mapa tilaba nungi tuluba tashi kata junga meinyaktetter. Anungji, Naga nunger ajungtsü asoshi mezüng teinyaktsüji Naga nunger kin ajak sabang ka nung ajurutepa jembitsüla. Iba mapa inyaktsübaji ajaki temulung lemteta aliba nisung aser lokti ka nüngdaker. Iba telokji Ao Senden asütsüla. Ao Sendeni Naga nunger asoshi shisabolua bilema Naga kin telongjem senden Aor kilem nungji ayongpet ayonga akatsüla. Khen khen Eastern o Western Naga na, khen khen Northern o Southern Naga na aser khen khenbo Naga kintem ajak sentepli ta telemtetba tajung kati maru tashi senteppet senteptsüla. Aji oda, Ao Senden ya Naga nunger telongjem bushir kin ka kümadoktsüsa tensa  mapang agi akanger. Joko, nüngdakbo nüngdak süaka Ao Senden mapang ya asenok tsüngda sobaliba aser lipoklisang tsütsü mangatettep adokba nung kanga meindoki Naga nunger telongjem asoshi endoktsüla. Aji oda, akok tashi party politics dang nungi temaba jenjang nung alitsüsa state government dak kangabo memetaloki alitsü merangtsüla. Iba denji ano, Ao Senden nung inyakertem tashi aser tasü itdakja Aotsür Aortemi shisatsü agi, rongsen agi aser nübo agi akok tashi yariteptsüla. Iba kasaji ano Ao Senden lenirtemia Aotsür Aor tashitemetettertem aser Naga yimten aser lokti asoshi aria bilemertem ayongdena shisalemsatepra, idakji Tsüngremi Aor nem Naga nunger asoshi shisatsü tajung ka agütsütsü ta amanger.