Aor linük tenzükertem rongnung putepa alitsü bangjem

Dimapur, July 30 (TYO): Naga yimten nüchiso bushiba wadang nung Aor linük tenzükertem telok balala nung liaka putepa alitsü asoshi telemtetba ka agiogo.
Iba telemtetba ya tanü Honibar nü Dimapur nung Kohima Aor Telongjem, Medziphema Ao Senso Telongjem, Chumukedima Ao Senso Telongjem aser Ao Senso Telongjem Dimapur  yimten pezü telongjem nung Aor linük tenzükertem den telongjem senden ka amenba mapang lemtet. Iba senden nung NNC aser NSCN teloktem nungi lenirtem aika dena liasü.
Iba senden nungsa “Naga yimten tebilemtsü akoktsü asoshi merangdangba mapa nung, koba telok nung südir süang, Aor linük tenzükertemi shisa tajung agüja Naga yimten nung lenirtem dang len sayutsü merangtsü,” ta lemtet.
Lenir ta asübaji menden masü saka shisatsü agüja mapa agi len sayua aobaji lir, anungji iba tangatetba nung Tsüngrem dang shisatsü meshia Naga nunger yimten tebilemtsü akoktsü asoshi yariteptsü iba senden nung jembia liasü.
Naga nunger linük tenzükertem telok balala küma lemsar aliba ya telokbo ka küma melongjemtettsüa akok saka yimten telok balala tentetter linük aser nübortem asoshi inyakba ama teputep aser tangatettep ka nung külemi inyaktsü merangtsü nüngdakba indang senden nung adener linük tenzükertem den tebu tedi tajung aikati shilem agia jembia liasü.
Tanü Aor linük tenzükertem putepa alitsü lemtetba ya Naga nunger ajak putepa alitsüsa inyaktsü tangatetba nung shisa lemsatepba sülen telemtetba agia liasü.
Iba senden nungsa Naga yimten telok balala nung Aor tenzükertem ajak tangatettep nung Aor Linük Tenzükertem Telongjem ka tenzüktsü asoshi bilemdangtsü lemtetter senshi.