Aor lokti tentettemi Dr. S.C. Jamir pusema nungiter

October 9, 2026 nikongdang Dr. S.C. Jamir’er Farm House, Chümoukedima nung Aor lokti tentettemi Dr. S.C. Jamir den senden amendang agiba noksa ka angur.

Dimapur, October 9, 2026 (TYO): October 9, 2026 nikongdang Dimapur, Chumoukedima, Niuland, Medziphema, Diphupar, Foothill aser Aoyim tesemtem nungi aor loktitentettemi Naga nunger lennir Dr. S.C. Jamir pusema nungiter ta sayua pa den senden tajung ka menogo.

Iba senden ya Ao Youth Organization, Chümoukedima-i ayongzük aser Dr. S.C. Jamir’er Farm House, Chümoukedima nung amen aser Ao Senso Telongjem Chümoukedima aser Dimapur-i anir Aor lanur telok aika aden.

NSCN (IM) lennirtem- VS Atem aser RH Raising nati jembiba meyipa agir ta sangdong agütsüba atema Ao Senden-i bangzüng ka renemba pusema nungiter ta senden nung adenertemi metetdaktsü.

Naga yimjung maparen nung sendaka alirtem aser talisa India sorkari yimjung aser tensa süngjemtsü atema Naga yimten latettsü mepishir ta senden nung adenertemisa bangzüng renemogo.

Naga Youth Movement-i anir Naga yimten tebilemtsü tekaraba nung latettsü atema inyakba mapa pusema nungiter ta senden nung adenertemisa bangjemtep.

Iba senden nungsa Dimapur, Chümoukedima aser Niuland district asem nung Aor lanurtem asoshi Western Ao Youth Front ta ser tenzüktsü telemtetba agiogo.

Iba joint resolution ya Ao Senso Telongjem, Chümoukedima, Ao Senso Telongjem, Dimapur, Dimapur Ao Youth Organisation, Ao Youth Organisation, Chümoukedima, Aoyim Youth Organisation, Diphupar Ao Youth Organisation, Foothill Ao Youth Organisation aser Medziphema Ao Youth Organisation külemi agiogo.