Aor nütsüng

Tsüngremi Naga lima nung Aortem nem temoatsü zünger mezüngma moaja lir aser item rongnung nütsüng arenba temoatsü ya asütsü. Abraham nem Tsüngremi moatsüba temoatsü tulutiba rongnung pa dak nungi jakzükba nütsüngtem anüng nung petinutem ama alijak nung zünger mezüngma züintsü ta nangzükbaji liasü. Iba temoatsü denji tanü asenok nütsüng züinba temoatsü ya medemdangra, atangji Tsüngremi Aor dak malangba temoatsü agütsüogo ta asadangtettsü. Yashi Dimapur nung Aotsür Aortem külemi adenshia Tsüngrem nem tenüngsang agütsüba sentong nung Tsüngrem tenzüker tebu tedi Rev. Kari Longchari-i jembidang ashiba agi, küm noklang ka ser lir shi jakdang Rev.Dr.Clark Ao limai arudangbo Aotsür – Aor nütsüng ajak agi meyirijang ter pongo shi dang liasü saka tanübo Aotsür-Aor nütsüng lakh ana jungogo. Ibaji bilemdangra Ao kin asoshi Tsüngrem sayatenya temoatsüji aji ka asütsü. Tapu aika bilemaka nütsüng nübo melira kecha meinyaktettsü. Iba temoatsüji bilemdanga tanü putu nunga Naga nunger tsüngdang Aotsür Aor taküm shiaji tatishitsü tajung kaka asütsüsa jaklaliro aser mapa agi sayutsübaji kanga tenüngdaktsü kümogo. Atangji, Rev. Karii ashiba ama, akhidang asen tsüraburtemi Naga lima tesem balala nung tetsüng agi  Yisu Khrista osang tajung den kaketshisatsü bener oagi shiruru den kasasa lia liasüba nübortem nüchi kümdakja inyakertemji talangka azüngba tashitemetetertem masü, saka class ana asem tashi azüngba mesüra Impur nung Bible School nung züngtettertem liasü. Ajisüaka, item tsüraburtem jagi pei tekolak nung pei khu bener tetsüng agi lepteptsüngtepa aliba tesemtem tonga oagi yimjung yangluja Tsüngrem yimli amenoktsü aser shisa tenük lapoka tashitemetet agütsü. Item denji tanü Aotsür Aortem medemdangra, nütsüng züinba dang masü saka tashitemetet aser alima rongsen akaba nung akhidang putu den medemdangtsüla masü aika kümogo aser tashitemetetter aser takar aika moatsüogo. Ajisüaka, tesasatsüka tanü asenoki asenok metetba aser akaba agi nübortem meima Tsüngremi mulungba mapa inyaktsü memulunger. Akhi tsüraburtemi inyakba ama, aseni metetba aser asen akaba agi tangar memeteter aser makar yaritsü melen asenoki item rongsentem jagi yimten yimli alitsü aser rakzüktsü meranger. Ibaji dang masü saka akhi tsürabur memesük tanü putu nung asenok rongsen agi tenük masüng pei agitsü kija bilemba dak alaka aikati tangar yaritsübaji asenok sobaliba masü amai kümdaktsüogo. Iba nungji asenok tejakleni onüaka mouteti anena lir. Akhi tsüraburtemi Tsüngrem dak amanga Pa yimli aser temeshiba tama bushia azüit, iba jagi asenok nem alima tashitemetet, alima rongsen aser alima yimten tashi moatsü. Item temoatsütem manung asenok Mokokchung, Kohima aser Dimapur nung dang lia asen akatsü aser asen ajungtsü kija bilema mapang talangka anisüngzüka liogo. Asenoki Dimapur aser Kohima nung dang alitsü memerangi tangari matongba aser tangari mounüba tesemtem tonga oagi teküpbok tia nung alirtem yaria anepalu tashi Tsüngremi asenok nütsüng züindaktsü, rongsen nung takar kümdaktsü aser alima yimten tashijia asenok ket nung liasü, saka Kohima aser Dimapur nung lia asenoki Tsüngrem masü rongsen aser yimten tashi bushiba agi Naga lima kanga mejungi raksatsüogo. Tanü Nagaland nung ochimashiba aser tashiyim amshiba indang kari danga jembia angashira, aji tanga Naga kini masü asenok tama ser inyakba mapatem lir. Iba nung jagi tanü asenok mulungjang shilanga arutsüla. Aji oda, tanüa asenoki anir asen kija akatsü marishii Nagaland takar kümdaktsütsü asoshi inyakertemjia Aotsür Aor asütsüla. Aor nütsüng paikaya kechiba tangar dang ayoktsü ? Kechiba asenokbo asen kija agitsü bilema-bilema meshimetsür jenjangi aitsü ? Kechiba asenok tangar tsübua alitsü ? Kechiba asenok meputepi alitsü ? Atangji, ibai asenok longjemtsüba mapang lir, anungji Aori Aor tedoktsü aser akhi ama tangar mounülen aser tangari matongba tesem aser nübortem kar danga anünga lira, item nübor aser tesemtemji Aor wadang südakjangma.