Aor pi oshi den mezütepa jembiba

 P.Renthy Jamir

Tang asenok oshi tsütsü asentenshi tialong mapang ano Ao oshi jembir aikati tangar oshi inoksema jembir. Asen lima makaba oset  pen ta, Radio ta, yamalabo kecha masü saka Chair -Tola; Bench -Süngla, Lock/jabi ta Dala ta süngküm ridangba teridangtsü yamala joko oshi tesamaleni aoba kar yangi tuteta sayur.
1.    Mona- Juli : Ajaki mona, mona ta jembir. Juli koba nung tai denloka mali iba dang Juli ajar. Alemli sen juli nung inoker ayu. Jang Juli nung seper bener senzü. Yangkhu ta süra tai denloka lir. Ango yangkhu ka sünga apu. Mersü yangkhu ka sünga aong.
2.    Rong,Rong atep ta jembir- Tuli Chuba tuli yanglok.Tuli benjung.
3.    Cuckoo- Tanuri joko Cuckoo ozü ta jembir Osotipong ,Phakho. Chungli mongsen.
4.    Satidaki aor- Kiyir benjung.
5.    Birthday- Asonü, tasoba anogo.
6.    Isab maka, Isab mali- Tepdang maka, tanadang mali.
7.    Support masü, Supporter mali- Pusemer temetanger, tetangiter tenungiter. Item ya oren balala nung amshir, asenok o takar.
8.    Paki ta cash ta jembir-Akhi mapang sen makadang oset den oset melentepa jang seret ka, mersü seret ka den melentep, süngo tera Naring kar den melen, süngmok agi Ngashi melen, iba dang chitsüng, chitsüng shishi ta aja. Tsuk timba shishi nung paki ta masü tatem. Cash toa masu jepdak ta jembir.Interest-tetemlok.Principal-sendong-tsük dang chidong.
9.    Situation- Aor oshi nung onsara temela tensa, tensa  den apet tensa majung yamala.
10.    Jaka- Iba ya joko ajaki jembiba o ka lir.Koba jaka ta, jaka mali ta jembir- Shir lushi nung ayanger  Na koba tesem nung amentsü. Lushi mesüra tesem

11.    Care- Tsüraburi tanur care masür ta jembir. Tsüraburi tanur akümasüng masür, telateküm masür. Ao o nung care mali.
12.    Ordinary- Nüsa- Tenüngbo Nokinba saka NAP nung kum 35 inyaker nüsa nung atsüng.
13.    Extra Ordinary- Sentsü aket. Sentsü aketer Talang, tetemsü, agi ataba tulur takar temeteter.
14.     Self- Styled- Sentsü nülok  Waro Todi ozü züng asong sentsübo sentsu angur saka peisasa nülokba Tsungrem sempet masü talang agi nülokba masü. Rasaa mashiyonga tanü asen lima sünga Majorba, Col-ba, Brigadier-ba yamala dang pi sentsü nülok ta ajar.
15.     Pension- Pension angu, Pension alu, Pension ao ta jembir. Iba ya Aor Lipok nung jembiba O temelen tajung lir. Atsüng par putu kum 30 nung atsüng. Küm 35 inyaker atsüng. Atsüngtok. Arogo nung atsüng.
Ano O tera zütepa jembiba kar- yangi arung ta masü, yagi arung ta asütsü. Yagi menang ta masü yangi menang ta asütsü.All India Radio Station Mokokchung kisanpani sentong yokba nung tetsürtemi Anüshi aon den chiyung tasa angashir. Nüoshi aon ta ashitsüla. Nüpang tou agi ashiba. Anüshi süra tsünglu arudang anü apudang apongba ta shiti. Ano asenoki tang tashi tera mebendangi jembiba mojing aser temenen. Asen tsüraburtemi iba ana ya aiben mebendangi jembi. Tena ya kenyongi balala tabo meteta lir.
Temeneni apu ta masü mojingi apu.(Satan/Devil) ta ashitsü
Temenen mena(Sin) temenenpur (Sinner) Temenen tera asem,semlok;ta Aori jembir.Mojing tera asem ta mejembir.
CALENDAR- Tatem nung ya shinür Asenok Aor kümsük, Itasük anogo züng indangbo jembir saka Calendar nüngja ka maka aru. Tangar temeteter lima nunga tangar nungi belenzüktepa mapang agia yangluba angur. Calendar tetezü Ita aser Anogo züngdangba aser Aori  Ita dang Yi ta ajar, Apalemi ta, Chisemi (Yi) J.P. Mills kaket nunga Yi ta lir. Ano anogo dang nü ta ajar. Kobanü, Kwinü-yakanü, tenetnü, ano azüngba dang züng ta ajar. Nütsüngzüng, tasotalir ajak züngdangba. Nübuzüng, nübujung tashi züngdangba. Anungji Aor Calendar dang ya YINÜZÜNG/ INÜZÜNG ta aja nung tapet asütsü ta bilemer. Ita aser anogo züngdangba.