Aor Samanir 25 indang otsü kaket ka saya

Brehostibar nü Dimapur Ao Baptist Arogo pur office kidang Chiyongdak takdang nung Wt. Tiala Imchen-i züluba “Ao Pioneers Taküm Otsü” kaket Chief Secretary, Wb.Temjen Toy-i sayatsüba noksa nung angur.

Dimapur, March 14 (TYO) : Aor samanirtem rongnung Naga yimten nüchiso bushiba mapa nung pei taküm aser rongsen tenlaa tenzüker, tanüla anir aruba mapa nung tanitebelem aser sensak tia arema tetsüng agi anogosa anogo agia Yisu temeim osang tajung bener jajartem, Nagaland akümertem aser Laishiba meyipertem parnok metsür pongo taküm otsü kaket ka tenüng agi “Ao Pioneers Taküm Otsü” tanü Dimapur nung Nagaland Chief Secretary, Wb.Temjen Toy-i sayatsüogo.
Iba kaket nung taküm otsü zülua aliba par 25 rongnung tang tashi taküm alirji parnok nisung pezü lir. Parnokji Dr.S.C.Jamir, Rev.Dr.T.Alemmeren, Rev.Noksangchila aser Dr.Senkalong. Tang tashi par pezüprongla ya temang junga dang lir. Parnok rongnung Rev.Dr.T.Alemmeren aser Rev.Noksangla nabo iba sentong nung arua dena liasü.
Ao Pioneers taküm otsü zülua aliba par 25 rongnung tang alima nungi piladoker aliba purtemji, Semsalemzüng, Rev.Supongwati, Imkongmeren, Mayangnokcha, Nokdenlemba, Dr.Imkongliba, Rev.L.Kijung, Rev.Longri, Rev. Ayutemjen, Rev.Takosüngba, Imnameren, Lukesasong, Yajen Aier, N.I.Jamir, P.Shilu Ao, Dr.T.Ao, T.Alima Imti, Rev.Riküm, Rev.I.Ben Wati, Sashimeren aser Tajen Ao nungertem indang taküm otsü shia lir.
Tanü iba kaket sayaba sentong nung jembidang, Akhidangbo, Laishiba dak alaka Ao oshi nung adokba kaket aikabo mali asü saka tangbo anogo shi adokba osangtem den ano kaket tasena aika adoka sayaba angur, iba jagi asenok aremzüktepba aser tangatetba nung tejakleni aoba sayur, ta Wb.Temjen Toy-i metetdaktsü.
Tanü Nagaland nunga Ao kin alidakji Samanir alidak, Land of Pioneers ta jatsübaji kechiba (?) ta bilema shitakba asenokji maparen ajak nung samanirtema ta sayutettsüsa alitsübaji kanga nüngdaka kümogo. Ibaji lanurtem asoshi tayongzükba tuluka asütsü ta Chief Secretary, Wb.Temjen Toy-isa metetdaktsü.
Tanü iba sentong nung Ao Pioneers Taküm Otsü kaket meshitetja Rev. I.Watii sarasademtsü aser Rev.Dr.T.Alemmerenia mapang tatsüka agia tepela aser tayongzükba o agütsü.
Iba kaket sayaba sentong nung kaket zülur, Wt.Tiala Imcheni jembidang, “pioneer-tem putu tensaji kodang reprangdangdir, asen lima nung yimsüsüba ana, British aser America nungertem liasü. America missionary-temi parnok taküm bendanga agüja nübortem shi aser tanüla nung nüchiba dangi ani saka British nungertemibo par khu benertem dang südaktsünü aser teti limapurtem tepu asem,” ta metetdaktsü. Pioneer-temi parnok ayonga alitsü asoshi mebilemi nübortem timtem tia nungi kümzüktsü dang bilema inyak, parnokji pei lima nübortem aser Tsüngrem meimertem liasü ta laisa ashi.
Iba kasa sentong nung kaketzülur pusema Wb.K.Temjen Jamir, L.Chubalepzük Jamir aser ASTD tir Wb.L.Wati Jamir nungertemi jembia liasü.
Iba sentong tenzüka IEF tezülur Wb.C.Akang Aieri sarasadem aser tatem nung Rev,Noksanglai sarasadem. Tanü iba sentong lenirji DABA nung sannüker Rev.Lima Jamir liasü.
Iba kaket nung tapak 705 lir aser jenjang Rs.700 agi angutsü. Iba kaketzülur den tongtepratepnüra mobile number 9856072258 ajanga tongteprateptsü akok.