Aor sannükertemi Aor teinyaktsü mapatem indang bilemdang tenzüker

Dimapur, Sept.25 (TYO): Dimapur Area Ao Arogo pastor tem Telongjemi ayongzükba “Rajemshiba” sentong ka tanü Hokolbar nü Darogapathar Ao Baptist Arogo tenla kidang agiogo.
Iba kasa mezüng sentong ya yaküm October 07, 2014 nung mezüng agia liasü aser tanü Hokolbar nü agiba ya kasa onük nung agiba sentong tanabuba liasü. Iba sentong nung shisalen tuyur Rev, L.Kari Longchari “Asüng Aor Tia” indang shisalemsatep aser Dr. Lulen Jamiri ” Akhi aser tanü Aor Sobaliba nung Ao Arogo” indang shisalemsatepa liasü.
Iba sentong nung Dimapur aser temeket nung aliba Ao Baptist Arogotem nung sannükertem den tenzükertem aser maparen tapu balala nungi teshimtetpurtem dena liasü.
Iba sentong nung adenertem rongnung shisalemsatepdang, Tsüngremi Aortem nem nungloktsüba mapatem meinyaki anena aliba wadangtem indang jembia ajungshitep aser Aortemi tangari temulung lemtettsüsa mapa ajak nung ochishia aser nendaka inyaktsü asoshi rongdak nüngdakba indang shisalemsatepa liasü.
Iba sentong nungsa Aortemi Tsüngrem O bushiba aser angateta benshiba nung asentenshi adoktsü aser temenen mapatem meinyaktsü ajungshitepa liasü.
Ano, Aortem asoshi teinyaktsü khuret indang jembidang, aiben Aortemi Naga nunger anir aotsü melen Naga nunger lokti tentet telongjem nungi pilaa alir. Itemji asenok dak taremzük aser tangatetba shisatsü maliba agi lir, anungji yamaji meli asenoka Naga nunger telongjem nung dena shilem agibasa tajungba asütsü ta tangatetba ka ayu.
Tanü iba sentong nungsa Ao kin nung tongtibang lokti tentettem den ano shisatsü agia Mokokchung district rangben sentaktepdakja terenlok mapa inyaktsü aser ano alima aser tanüla tsütsüa teinyaktsü bilemdanga asentenshidaktsütsü sentong yanglua inyaktsü asoshi “Think Tank” ka shimtsü lemtet.
Iba senden nungsa asen lima nung Aor sannükertemi anir ochishia alitsü atema nisung ajaki pie taküm nung menaba taitem nangzüktsü aser kong lidir liaka senso tajung ka ama kechisarina nung azüoka alitsü aser nüngdakba purtem meima yaritsü ajungshiteptsü ta lemttetogo.