Aor senso ka akümba

~ L. Kika Pongener.

Anogo ishika süiogo, iba osang kaket olemsabang nung “Ola-osübo kasa saka tangatettsü balala” ta sür ocet ka ni angazüka aruba nungi olen kar lemsatepogo, iba ocet den sentaktepa ano kü tangatetba nungi asen ‘Aor senso ka akümba’ indang tongmelang agi olen kar lemsatepnür. Taoba ocet nung zülusemba ama-to, Aor tebur ka kodang arishi küm ter pungo (15 yrs) tema tain nübujunga kümdir süngpoi aitsü, ajiser süngpoi aiba anogo nungjagi pa yimrong nung yongSük Sükoka senso ka akümer ta tamasa angateta yudi. (Ni iba ocet nung mela-mela angatettsü atema tebur tsütsü dang atsünga zülur, saka ibajagi tetsürtembo meSükshir/Süktoka-atoker, mesura tetsürtembo iba senso temeden kecha mali ta mangatetdaktsünür).
Aji oda, kodang yimer lokti senden (Yim Mongdang) ka alitsü atema Yimsusur Tatar mesura Gaon Bura-i yimyim ayimdir “Sungpo nungi Poti tashi” ta ayimer. Tetezü, joko kodang sungpoi yidir pa yimrong nung yongSük Sükoker aser senso ka akümer ta ibajagi tejangja rajemtsür. Asenoki aiben iba senso ta asüba nung ya mebenteti jembir aser angateter. Tatishitsü agi ni mapa kar atema ‘Petition’ ka agütsüra, kü talidak tesem (Address) kü tasoli yimtsüngji ‘Permanent Address’ ta agütsür aser ni tang telidak tesemji ‘Temporary Address’ ta agütsür. Iba nung tongtipang tangatettsü kaji ni tang telitak tesemjibo ni mapang tatsüka atema alirba dang, anungji iba tesem nungji kü senso temeden maka ta rajema angateter, saka kü senso temedenji kü tasoli yimkong nung dang yua lir. Ano iba den sentaktepa mela-mela angatettsü atema tatishitsü ka yamai shinür, Ao Senso Telongjem Dimapur, Ao Senso Telongjem Zunheboto, Ao Senso Telongjem Wokha, Ao senso Telongjem Tuensang, Ao Senso Telongjem Medziphema, Ao Senso Telongjem Chumukedima, Ao Senso Telongjem Diphupar etc. Iba ama ‘Senso Telongjem’ nung saru agüja züngsem küma atenba agi teti atema senso ka (Permanent Citizenship) akümba kecha mali. Na aser ni iba tesem nungji küm kwika, ita/anogo kopika lidir iba tashiji iba telongjem tazüokba ka küpok züngsem ka küma alirba dang. Aji oda, iba ‘Senso Telongjem’ tentet yabo, Aor senso shia yimtsüng balala nungi senteper temzüng-ozüng tazüokba ka küpok longjema aliba tentet ka dang lir. Ajisuaka, ni taoba ocet nung zülusemba ama-to, kodang asen tetsü tasoli dak alaka, tanga yim ka nung ‘Senso Mungdang’ saru agüja züngsem kümdir, ni iba yimtsüng nungji teti atema senso (Permanent Citizenship) ka akümer. Asen sobaliba nung senso agiba ya mapang tatsüka atema agi-aka, kodang nisung kati tanga yim ka nung senso agidir, pa iba anogo nungi mezüng senso nungjagi temedenji agientsüsa akümtsü. Kechiyong senso ta asüba yabo asen alitak tesem melenshiba shia khen agili taodang toktsür oli ta melenteptsüba nungja ka masü ta angateter. Aji oda, pei pei tetsü tasoli nung chichiba (Original Citizenship) senso ka yur, ano tanga tesem nung liyunga sennudang tesem balala nung senso taila (Duplicate Citizenship) ka-ka agia ayutsü aser taodang iba sensoji toktsür aotsü, ajibo asen sobaliba agi memelatsü sudi ta bilemer. Asenoki ‘Ao Senden’ Temzüng nung züngdangra, Arla -3 (2) nung yamai shia angur, “Jila balala aser pei Tsükong/District balala nung kongsa Aor yim/yimtem kümteta lir item lokti tentet ajak dang ‘Ao Senso Telongjem’ ta ajatsü/amshitsü” ta zülua lir. Anungji iba nungji asenoki angatettsüba kanga tongtipang kaji, asen Ao lima nungi pilaa orr District balala nung kongsa Aor yim/yimtem küma odir idakji aliba lokti tentet ajak dangji ‘Ao Senso Telongjem’ ta dang ajatsü/amshitsü ta jangja-jangja shia lir.
Atangji iba temzüng nung ‘Ao Senso Telongjem’ ta ajatsü/amshitsü ta asüba dak alaka tanga nungja kecha amshitsü shia mali ta rajema angateter. Iba temzüng ya Aor yimtsüng/tsükong ajak nungi teshimtet nubu (Representative) adenshir mongdang lia teka mekanga agizüka ayuba (Approved) temzüng ka lir. Anungji iba temzüng ya Aor senso ajunga koba tesem, koba lima, kongsa prokshia oa lir, item ajungaji kasa temeden ka nung azüoka longjema alitsü nukjidong nung yangluba temzüng ka ta angateter. Atangji Aor senso kija aser lokti-tentet, yimtsüng aser tsükong katia/shingaia iba temzüng tazüokba küpok onokbo dena mali-a ta meshitettsü. Ano iba dak alaka, tatishitsü agi asen Aotsür den kibalembua alir tsüma-longmar kari, mesura Naga nunger-sa suaka tangar kin asen Aotsür den kibalembua alir kari, Aor senso kümnüra pai tamasa koba yimtsüng nung senso kümnür idakji aliba senso tejangja ka dang tebu ayimtsüla aser iba tebu ayimba kidongbaji yima senso alizükdaktsütsü. Ajiser, iba anogo nungjagi pai shiba dang tebu ayim pai pa tebu ka ama pa khuret (Responsible) ajunga agitsü. Ano tangar kin masü Aor kati tanga yimtsüng ka nungi arur yim ka nung senso aginüra, pa-a iba kasaji pa kechi kidong iba kidongbaji bushia tebu ka ayimtsüla, ajiser iba kidongbaji yima senso alizükdaktsütsü. Atangji Tsüma-longmar/tangar kin kati Aor yimtsüng ka nung senso ka akümtsübaji kanga pongpa-pongparbo masü. Anungji iba nungji kanga tekümdangtsü kaji, nisung ka Aor senso kümdaktsütsü atema saru ka atakteta yur aji saruba, mesura nutsüng-nubu aika anitena (Enrollment) aika akümtsü mechi zübazüba, sobaliba inyakyim tim teinyaktsüyim kecha meinyaki/mebenshi-i, oda saru-molok sen teraka atakteter aji sarur, register nung tenung züluoka, Aor senso ka kümdaktsüra, iba amala nisung jagi asen yimtsüng atema dang masü, saka asen kin asen linuk atema tebilemtsü khuret/tenung menuk tulu bentsür arura, ibala ama atalokdangji pai tebu ka yima melira shibai iba khuretji abentsü (?) ta shisadangtsü kanga tongtipang lir. Naga nunger/Aor masüba tangar kin kar Aor senso akümtsü atema tamasa tebu ka yimdaktsütsübaji kanga tongtipang. Anungji senso ka akümtsübaji zübazübaa masü sobaliba dak ajemdaker kanga dang metsüngareta inyaktsüla-a ta kü tangatetba nungi olen kar lemsateper. Iba ocet nung aibelen kar lira meteta alirtemi metongshitsüra pelashishia agizüktsü, ajiser iba osang kaket nung dang metongshiteptsü mepeshir.