Aor shisaliok (education) tsütsü sentilong laoa lir

– Talitemjen Imchen.

Mapang kabo kaketreju rongpang (competitive examination) balala nung, Aor kaketshir kanga adoka, iba ji sentilong ka ka ama Naga kin ajongai nükshia aküm. Tanübo iba sentilong ji asen lenjang nung laoa lir. Tang aliba tsüraburtemi laodaktsü asü? Mesüra kaketshirtemi iba sentilongji makokerar, alimai bushitsü mapang tongja tongogo.
Tanü Aor kaketzüng kimong kong lir, akhi kaketzüng kimong mali anenzüka ogo. Kaketshirtemji reprangdangra degreebo ajaki angur, saka iba degree-ji bener kaketreju rongpangi aodangji tangar makoker. Aorbo madoker ya kechiba? Kaketshiri abenba degree denji ano nokonü kechi abentsüla? Kechi agi meperir asüng Ao kin wazüka ayutsü asoshi, lanu tain ajaki ken bushizüngdangtsü nüngdaker.
Joko küm terjika arudagi. Asenoki osang kaket balala nungji reprangdangra, Naga nunger rongnung kaketreju rongpang balala nung takok angurtemji Tzüinertemi 60 to 80 tashi shilem ngudagi. Tanü parnoki kaketzüng kimongji mesemteta lir. Ni Tzüintsür ka dang par kin kaket reju rongpang nung longsoa takok anguba indang asüngdanga liasü. Lai ashiba agi, “Onok written tashi mesüra prelim tashi dang takok angurtemjia aika dang lir. Parnokjia anogo shia ghonda pongu aser trok tashi lesson bushirtem lir” ta langzü. “Naga nunger rongnung kaketreju rongpang nung takok angutsüba ya nenokbo senmang ka ama kümogo” ta ni medangsem. “Asenok tanü tensa nung kija temeden kangabo mali kümogo. Saka kaketshir kati kaket reju rongpang nung nokdaktsüba temedenji onsara ulua lir. Asenoki ibai senmang ka ama masü temeranger meyong ama bilemtsüla,” ta lai angatetdaktsü.
Tanü Ao Senden Telongjem Dimapur Mendendi ajanga, Ao Kin Tetsü Oshi Shisanga Wazüktsü Ayongzüker” ta ser, “Taruba adok Ao Osep” Dimapur nung alir Aor ajaki alidaktsüner ta yimyimdagi. Aor kaketzüng kimong tanaben meyushia mesotettsü asoshi ibai mozü tajung ka asütsü. Dimapur nung alir Aori dang masü, alima ajonga nung Aor alir ajaki iba omen nung rangloktsüla aser ranglokdaktsüner.
Yimya agi osep kaket ka jenjangji Rs.500/- teküpbok agi mangutsü. Saka Rs. 200/- dang agüjaa atar, ita ishika tsüngda nung osep kaket ka angutsübaji onsara tajangzük lir aser remso ama ajaki bilemtsüla. Akok nungbo tanga town union aser yimtsüng shia nung ASTD ama telok balalai ayongtet nungbo, Aor asoshi mera tasenji ibaji asütsü.  Union balala ta dang mesüaka, molungtet telok balalai itemji ayongnüra, yimtsüng aser town ajak nung ASLB-i timchi (scope) aser lenmang lapoka yutsütsüla.
Asenok dak tashimait lir. Ajaki pei chirnur tajung kümdaktsüner, saka tsüraburi tanur sayutsübo doktsür, shisaliok jenjangji kechiar kenyongi memetetba lir. Ano temenünütsükaji, aikati Ao oshi mezüngtetbaji konang ama jembir aser bilemer. Ano kari Ao osang kaket balala zünga angudang, medemeri lutsür aser tazüngeria akmesena bilemer. Teka nung maliba oset ka nung ranglokdang, teka nung alibabo aiben tamachila ama amadoker. Yamaji tangar oshi jembitsü merangdang pei oshibo sendoker. Aser aiben town nung pei oshibo tamachila ama toktsür tangar oshi agi dang, Aor chanutem yongtsü nung jembiteper. Ao osep tasen adoktsü ta sangdong dang ji, karibo pei oshi indang osep sen agi alitsüba na ta bilemya alitsü südi? Nai yamaji bilemya lira, ne taküm nung tesasatiba aser tamakoklenji ibajia ka asütsü. Kechiaser oshi kaji taküm, “injen ainer aser renlokjen renloker.” Yamaji Aor rongnung teimbai tashimaitlen bilemya lirapang mesüra benshia lirapang, Ao kin rajang akümba ya dang masü, asüng asoshi ayatai asütsü. Tsüngremi ASTD aser Ao kin moajangma.