Aor sobaliba tajung wazüka ayutsüla

Mokokchung, JAN 29 (TYO): Aor sobaliba tajung aika samadar, anungji, item sobaliba wazüka ayutsübaji kanga tongtibang kümogo, ta Nagaland Higher & Technical Education Minister, Temjen Imna Along Longkumer-i Jan 29 nü Mopungchuket yimdak sobaliba tokzük sentong ka nung jembidang metetdaktsü.
“Asenoki tema nungbo sobaliba wazüka ayutsü atema sashia jembir, saka kilung nungbo asenoki meinyaker”, ta pai ashi. Paisa iba dak sentakba nung metenloktsüdang, “alima tejakleni renloka aoba den külemi lanurtemi pei sobaliba mamatoki angazüktsüla aser benshitsü merangtsüla aser asenokji shiba’r jangjatsüla”, ta ashi.
Tanü asenok ya tzümar aser bendanger sobaliba den meyoktepa lir, anungji, “yimdaki meyipa arutsüla”, ta paisa tayongzükba ka agütsü.
Tanü citizenship amendment bill (CAB) indang ya ayimsünga jembir, iba yagi asenok maoksatsüla, kechiyong Nagaland bo India temzüng kübok Arla 371 (A) aser ILP yagi asenok kümzüka yutettsü, ta paisa nübur memangmangtsü asoshi jangjashitsü.
Iba sentong nung telok balalai sobaliba ken aser yartsüngsang tapu balala ia sayuba ajanga tesentepertem peladaktsü.