Aor tatartem & NPF teloki Ao Senden dang mepishir

Dimapur, Jan.10 (TYO) : Ao Sendeni yashi Hombar nü Nagaland minister, Wb.Nuklutoshi jenjang luja metetdaktsüba aser pa Mokokchung district toktsür aotsü ozüng agütsüba mapatemji taoksatsüka lir aser tim masü, anungji ibaji agientsüla ta tanü sangdong balala nung Aor Legislator-tem aser Naga People’s Front, Mokokchung Division purtemi mepishia metetdaktsüogo.
Mongolbar nü yangi Dimapur nung Aor Legislator-tem rongdak senden ka mena metetdaktsüba osang ka nung, ” onoki Ao Senden aser lokti tentettem akümtsübur, ajisüaka hon’ble minister ka dang ‘so called Minister’ ta ajabaji yimten nung tim o masü, iba jagi hon’ble minister jenjang ludaktsür, hon’ble minister-ji shiba südir süaka paji nübortemi küm pongo atema shimtetba aser India temzüng kübok tenangzükba agir yimsü asür, anungji yimten nung iba ama o amshibaji taoksatsüka aser tesüngmangtsüka lir,” ta Aor Legislator-temisa metetdaktsü.
” Nagaland nung Urban Local Bodies election agitsü lemtetba mapa ya kijai lemtetba mapa ka masü saka government-i lemtetba mapa ka lir, anungji Hon’ble minister, Nuklutoshi jagi pai mulungba ka inyakba masü saka Mokokchung district nung in charge ka ama official mapa inyakba liasü, anungji Ao Sendeni inyakba mapaji kanga aritepa telemtetba mejungi agiba ka asütsü ta Aor tatartemisa metetdaktsü.
Teti Ao senden aser legislator-tem tesendaktep kanga junga lia aruogo aser timtem mapang ajak nung shisalemsatepa koka aruogo, ajisüaka tang yabo Ao kin atema dang masü saka Nagaland nung alir ajak atema inyakba mapa ka nung Ao Sendeni pei züngsem ka anema meshitaki inyakogo ta Aor legislator-temisa metetdaktsü.
Anungji, akhi ama tesendaktep tajung yur külemi nübortem tenzüktsü asoshi Ao Sendeni 9th January, 2017 anogo nung lemtetba telemtetbaji meyipa reprangshia bilemdangdaktsüner ta Aor tatar yimsüsürtemisa mepishia metetdaktsü.
Iba sangdong nung tenüng agüja alir Aor legislator-temji C.Apok Jamir, Imtikümzük, S.Chuba Longkumer, Dr.Benjongliba, Dr.Longri, Merentoshi R Jamir, Dr.Imtiwapang aser Amenba Yaden nungertem liasü.
Ano, kasa onük nung NPF Mokokchung Division purtemia Ao Sendeni January 9, 2017 nü Wb.Nuklutoshi-ji ” so called minister” masü Arkakong constituency nungi nübortemi shimtetba Hon’ble minister ka lir ta metetdaktsü.
Tang Urban Local Bodies election agitsüba maparen nung ya pa dang masü saka government nung alir ajaki shilem agia inyaker, anungji pa balaka mejetteta tetshitsüsa nüngdak madoker ta NPF Mokokchung Division sangdong ajangasa metetdaktsü.
Anungji, Ao Sendeni ‘hon’ble minister’ dang Mokokchung district toktsür aotsü ozüng agütsübaji tim masü ta metetdaktsür aser iba ozüngji tekaratiba nung agientsü mepishir ta parnokisa metetdaktsü.
Ao Sendeni Nagaland cabinet minister ka amokmerena Ao lima nungi aotsü ozüng agütsüba aser ‘so called minister’ ta ajabaji kin ka madak tematiba lokti tentet kati inyaktsüla mapa masü ka inyakogo ta cabinet-i lemtetba ken o ka CMO Media Cell ajanga metetdaktsüogo.
Kasa onük nung Chuchuyimlang yimteni Ao Senden mapa aitsüogo aser tagizüktettsüsa Ao Senden nungi kuli tejangja mangu tashi Chuchuyimlang yimten Ao Senden nungi atsünga atar ta Riongsanger Putu Tatar Salang sangdong ka nung metetdaktsüogo.
(Ao Senden dangi züluba shidi agütsür).