Aor tebu-tedi ka Tsüngrem dang kanga nenjemseta sarasademer

~L. Kika Pongener Aoyimküm, Dimapur.

Oh tulusang, takoksang, ajak madak tematiba Tsüngrem,
Putu aika nai ozü Ao kin tang kanga meima junga aruogo,
Naga lima nung kin ajunga madak tanishir kümdaktsogo;;
Nokinketer,walunir, watsü-wabong ,lanu-ain jenti sotetdaktsüogo,
Kenshi-oshir,tashi-tawa’er aser taka-taiter jenti sotetdaktsüogo.

Kin aika tammang tia nung aliba ozüi tsüngdong orr tenük lapoktsüogo,
Naga kin rongnung adianu tambu ka ama akümdong süa lia aruogo;
Kin o kin tsüngda ken-o adokdang tambu ka ama tetsüngdai ia yaritepogo;
Lenmang memetet nükpoker nemzür ama jajaa alidang lenmang sayuogo,
Ak oktsülaa kolak nung jana ajak zükdenba ama nungsen ajak ni benloka aruogo.

Saka tanübo Naga nunger kin ajungai ozü kin dak mekutmesentsüsa ya kechi ?
Ozü kin tai asü mesüra ni kü terongdong nung pongtetba tanuri kü dak angoer;
Sorkar mapatong ,inyakyim,lemya-lemko ajunga nung nibo mezüngok sükdoker;
Sorkar terenlok tagi-tarutsü mapalem nung nibo ojangdang agiang ta ashir;
Ozü Ao kin tu asangchi tanür mesenmetoa amshiba den tepila mali kümogo nii…

Oh Tulusang Tsüngrem,nai ozü Ao kin mesendoki khen meyipa reprangang nii…
Ozü Ao kin yimsüsür nungi tenzüker lanu-ain, nütsüng nübu, tetsür tanur ajungai;
Onok khen ali-i alur temokok agi ali nung tsükiter anak-auyi mezüa lumidakjang;
Onok tsüngda nung kati ka arishitepba,kati ka sempatepba ya joko intokdakjang,
Yimpo- yimli tambu raktepba,lipoklisang teyazü bushitepba ya anendakjang.

Ozü Aor lenirtemi kara-karaa telemtetba magii,kanga aroka bilemdangdakjang,
Kechisarna nung yak-yakta jioka teka amuoker atara tetsüngda o meshitettsü,
Ken o maparen ajak nung teyongtsü nung nokdaka atar yimjung yanglur südakjang;
Kechisarna tzüzüng-ozüngji-a aki tanem-ka mapang nung inyaktsü apitetdakjang,
Tim mapa inyaker asuyongjia jongdak nung inyakra nangnanga magizüktsü ako…

Ozü Ao kin nüjiso bushir linük tenzüker lenir watsü -wabong tajungtemji-a,
Joko nujiso bushiba mapa tatempang telemtetba ka agitsü ariteper-a ta asürji,
Naga nunger nüjiso bushiba otsü-olem nungji ozü Ao kin-a kechi nung atongoktsü ?
Ta tebhong ka küma langteper kenbang-obang ka sür lenmang bushidakjang nii…
Tang yabo parnok tsüngda kati ka arishitepa tsükchiteptsüba mapang masü-ako.

Oh Tsüngrem,,ozü Ao kin dang ozü tsürabur mapang nungi meima aruba Tsüngrem,
Ozü nübur dang aochiang aser akhi ozü tsürabur maongka tu khen meyipa arudakjang,
Ozü tsüraburi nai atakatemtsüsa aibelenba temenen kar lira lumia nangzükdi-kor,
Nai onok teti asoshi mesentoki,ano khen ozü Ao kin dak sakloka reprangang nii….
Aoer yimsüsür nungi shir lanu-ain tetsür tanur ajungai ne dang tatok meshir ako,
Oh Tsüngrem….. nai ozü sarasadem langzüang nii….. Amen.