Aor telongjem sabang

Aor telongjem sabang, Ao Senden nung inyaker mendenpurtem ajak anentsüsa akümba tensa, kuli aser inyakyim ajak ya jungjunga bushidanga bilemdangtsüba ya  Ao senso ajak asoshi kanga tongtibang mapa ka kümogo. Lokti tentet nung menden purtem rongnung kümsük küm metemjungi kar anentsüsa akümtsüa akok, aji loktiliba yimya saka kenyongi ajak anentsüsa akümba anogo mapang yabo tajungtazü masü. Ibai Ao kin asoshi tamakok ka asütsü, kechiyong tamakok angubayongang lenirtemi anir moutetter asütsü. Atangji, iba ama tamakok mapang shiba tai ta bushia aitsütsübajia kangabo menüngdaker saka kechi tai tabo bushia metongshir aotsübaji tarutsü lanur putu asoshi kanga tenüngdaktsü asütsü. Lokti anir moutettsüsa timtembajibo tanirtemi dang metettsü saka lianungi reprangertemi reprangtetba agibo asenok Aortem ya asenoki angatetba aser asenoki mulungba nung masü saka tangar nem asenok anishidaktsür. Iba jagi asenok dang masü saka Naga nunger ajak akoksadaktsür. Nagaland nung Aor chanu ka lokti aser yimten nung tanishir ka akümtsü asoshi tangar dangi tasüngdangi aotsüsa akümer. Aor yimten yimsüsürtema yamaji tangar dang asüngdanger külenang yimten mapa nung ajemoker, iba amajika mesüra tamakok angutsü aser lendonga ajurutsü. Aji oda, lenir asütsü Tsüngremi shimtet ta jembiba kin to tanübo lenir asütsü tangar dang nungi temelaba agir külenang amena amentsü aser nokdaka nokdaktsüsa asenoki asenoksasa yangluteta lir. Ibayongji, asenoki tatem matonger. Atangji, asenoki shitak inyakner aser indangindanga onür saka moutetter ta süshiba mapangji Aortem asoshibo 21st century ya asütsü. Iba century tenzükli nungi süshiba tang tashi asenok tetugulen lenmang mangu süshiba asenoki metetter. Ashiko, tamalen asenoki inyaksaba temenen agi tanü asenok süshir asütsüa akok. Ibai asenok asoshi maksü mapang ka lir saka asenok menen agi asenok lenmang mangu süshiba ya tangar tsüngdang miimshitsü makok. Aji oda, Nagaland government-i Rongmei nunger nem Nagaland nunga parnoka kin ka ama züngshitsü asoshi jenjang ka agütsüba ajanga ajuruba tebilemtsü jembia jembia Ao Senden nungang mepetmesü adoktsüsa aser tom nung mendenpurtem ajak anentsüsa akümba tiaji tesasatsüka lir. Atangji, Rongmei nungerji Naga nungersa süaka Manipur nung kin ka lir, anungji Nagaland nunga parnok nem kin ka jenjang agütsüba agi Nagaland nung alir Naga nunger lanurtem maparen aika nung takoksa angutsü, anungji magütsütsüla. Aji oda, junga mebilemdangi parnok nem kin ka jenjang agüja alibaji mapang talangka magii state government-i agientsüla. Iba amaji state government-i meinyak tashi Ao Senden nükenbelemtsübo lir saka iba jagi Aor rongnung meputep adoktsüsabo kecha mangur. Ajisüaka, asenoki asenoksasa asenok meputeptsüsa tebilemtsü yanglur, ibaji asenok angatetba nung masü tangari angatetba nung asenok anidaktsüba ajanga lir. Tanü asenok ket nung asenok aotsüba map maka tangar map nung asenok aoer. Aji oda, tanü Ao kin asoshi nüngdak tulutibaji Aor aotsüba map asütsü. Iba map jagibo Aor dang masü saka Nagaland anitsü. Iba map-ji asenok tangatetba asütsü. Iba tangatetba jagibo telong-tema nung alir tangartemi kechi ashir ta masü saka Ao Sendeni kechi ashir ta asütsü. Iba jagi Ao Senden dang masü saka telong aser tema nung alir ajak tajangzük angutsü. Idangjibo, alima yipru mopong tulu onaka asenok mainzütsü, amang tulu aruaka asenok len züa majemoktsü. Idangjibo asenok akümtaket asütsü anungji tangari asenok mesüzüktsü memerangtsü. Iba ama tensa tajung aser Ao yimli ka yanglutsü asoshi Aor tuluba nungi shir tilaba tashi agi Ao Senden akhüm kümzüka ayutsü merangtsüla. Ao Senden akhüm kümzüktsü asoshi Ao senso shiai ochishia alitsüla, aremzükteptsüla, Naga nunger sabang nung Ao kin tebilemba shitettsüla aser Aori Naga nunger ajak ajungtsü asoshi bilema inyaktsüla.