Aor telongjem sabang

Telongjem ka nung tensa mapang tajung-majung ajak nung akok tashi kenbang-obang medemer yimten, loktiliba aser sobaliba maparen ajak nung lirodema aotsü nükjidong nung Aor ajak telongjem sabang asütsüsa Ao Senden tenteta lir. Atangji, iba sabang ya Aor sendendak asünungji Aor dak aketba ken o tasak aser temela ajak benoka jembidak aser alangdakdak lir. Anungji, iba sabang nung jembiba ken o ajakbo tepela o masütsü mesüra tarütsü o a masütsü. Aji oda, Ao Senden ya Aor ajak peladaktsütsü tentetba telongjem ka masü saka Aotsür Aortemi junga inyaknü tenüng asangtsü aser majung inyaknü arütsütsü aser merenshitsü aser tensa tia ajak nung ajungshitepa linük asoshi inyaktsü tentetba telongjem ka lir. Iba telongjem yagi Aor ajungtsü asoshi dang masü saka Naga nunger yimkong ajungtsü bilema jembitsü aser inyaktsü khuret tuluka pongloka lir. Ibaji asenok ajak asoshi kanga tekümdangtsü lir, kechiyong kechi mapa aser mapang nung südirsüaka tangari Aori kechi inyaker aser Ao Sendenia kechi ashir ta asübaji tama reprangner aser metetner. Iba ama khuret tulu benloka alinungji, Naga nunger rongnung Aor senso shiai tangar dang nungi khuret talila kakabosa abentsüsa adoker. Atangji, iba tenlaji rongsen dangbo masü saka Aotsür Aor taküm, nübo aser shisatsü asütsü. Iba tangatetba nung Naga nungertemi Aotsür Aor leniba nung temulung lema anidaktsüsa Ao Senden lenirtemi anir Aotsür Aor ajak alitsübaji kanga tongtibang teinyaktsü mapa ka kümogo. Aji oda, Aor yimten aser loktliba meraketa yunüdang Ao Sendeni aiben telemtetba tasak agitsüsa akümer aser iba ama telemtetba jagi aika yirur. Ajisüaka, kar mulungjang yiru tsübua yimten telemtetba takang ka magitet yutsüra, iba jagi yimten  aser lokti telongjem tashimait atentsü. Ibayongji, ochi nungbo yimtenbo tenük amur shinga tsütsüa mereprangi telemtetba shitak agitsüsa akümer. Ibayongji, tanü ama nisung ajak nem kechi jembiner aser züluner jembidaktsüba aser züludaktsüba  putu nung aikati Ao Senden ama, pei yimten aser külem telongjem, lokti sabang anema jembiba angashir aser züluba angur. Ibajia tim kechiyong tanübo yimteni pei senso bang nembangtsür yimsüsüba putu masü. Iba jagi anogo shia asenoki kari mesüra karibo government anemba osang angashir aser iba jagi dang government-a tashi aiter. Ajisüaka, tanü putu nung senso shiai metettsüba mapa kaji senso shia nem temeten agütsüba temeten ya pei jembinütsü aser pei inyaknütsü inyaktsü agütsüba temeten ka masü saka yimten, lokti aser alima ajungtsü asoshi sademsadema jembitsü aser inyaktsü temeten agütsüba lir. Iba khuretji meteta Ao kin mechi nung pei tangutsü tim süaka magi arema aser pei agitsü tim süaka magi arema Ao senso shiai tenla agütsütet nungbo iba jagi Ao kin wangshitsü. Asenok asoshi tia majung kaji aiben asenoki ajak temulung ka ser telemtetba magitetter, ajisüaka aji tim dang lir, kechiyong alima nung nisung aika rongnung ajaki mulungba nung telemtetbabo aiben magitettsü. Iba jagi democracy yimya ajanga teimbai mulungba nung shimtsü aser agitsü ta yimten inyakyim metongmetonger ka lateta lir. Anungji, kodang yimten aser lokti nung teimbai mulungba nung telemtetba agiadokdir akok tashi züngsem ajaki iba telemtetba nungji adentsüla. Tanübo aikati Ao Sendeni yimtsüng nung putu mendeni inyakba  ama Ao senso ka merenshitsü makok ta jembir. Ajisüaka, asenok ajaki metettsüba kaji, Ao Senden ya Aor yim ajak nungi tatar yimsüsürtem adenshia akümba Aor sabang ka lir. Anungji, Ao Senden temzüng nung kechisa lateta lidir, item ajakji Aor yimtsüng shia nungi putu tatartem adenshia latetba lir. Iba amaji Ao Senden ya tashi tulu aketba telongjem ka kümogo. Iba khuretji meteta Aotsür Aor shiai Ao Senden aitsütsübaji masü saka Ao Senden merakettsütsü bilema inyaktsüla. Ao Senden mera aketba agi Ao kin aser Aor mera aketer aser kodang asenok meraketdir asenok ket nung yimten tashi aser ali rongsen ajak kar ta bilemdi.