Aor tesendaktep

Aortem asoshi tang nüngdakbatem rongnung tongtibang kaji Aor rongnung aser ano tangar pur bendangertem den tesendaktep tajung alitsü nüngdaker. Nisung ajaki tajung dang bilemer saka tesendaktep junga maliba ajanga tajung bilemertem rongnung temulung melemtep adoker. Ibayongji longjemer mapa tajung aika inyaktsü melen melongjemteti tebilemtsü aika ajurur. Aji oda, nübortem rongnung dang masü saka yimsüsürtem o lokti tentet lenirtem na tsüngda tesendaktep junga maliba ajanga nübortem aiben takoksa ajurur. Iba ama timtem aser takoksa ajurubatem rongnung tawa ULB election dak aketba maparen nung nübortem ajunga akoksatsüsa timtem ajuruba tia to ka asütsü. Iba ama tapok aser tebilemtsü reprangtetba agi, taoba hopta nung asenoki iba osangkaket nung ” Aor MLA-tem rongnung nisung ka Ao Senden den tongteprateptsüsa shima ayununga koma süla ? ” ta asüba onük nung bilemdangogo. Atangji, iba shisadangba nung tazünger aikati shilem agiogo aser aikati telangzüba agütsüogo. Iba ama tasüngdangba jagi asenok nem teinyaktsü khuret kabosa teyur asütsü imlar. Shitakba nung Ao Senden den tongteprateptsü asoshi Aor MLA-tem rongnung nisung ka mejeteta shima mayutsüa akok saka Aor MLA-tem o Ao Senden na tsüngda tesendaktep alitsü nüngdaker. Aji oda, iba tasüngdangba langzürtem kari temulung melemi MLA-tem nemang Ao Senden lenirtem mesüzükdaktsütsü ta bilemba amaji masü saka parnok rongnung kati ka den shisalemsatepa Naga lima ajungtsü asoshi inyaktsü. Atangji, MLA-temji Ao Senden kadang masü saka Ao Senden kübok, anungji shir südir süang Ao Senden akümtsübua shisa agütsütepa inyaktsüla. Aji oda, Ao MLA/ minister ka Kohima nungi Mokokchungi aotsüsa kümra Ao Senden lenirtem den kenbo amentsü sentong nung alitsüla. Aji oda, mapang mapang shia Ao senden lenirtem o Aor MLA-tem na tsüngda Kohima nung asüyonga külem telongjem senden lia shisalemsateptsüla. Ashiko, yimsüsür karibo teyari meshi tsübuba agi lokti tentet lenirtem majurunütsüa akok, ajisüaka lokti asoshi teyari meshi tsübua kazüba jagi yimsüsürbo tebilemtsüang bendenloktsü. Aji oda, yimsüsür ka mapaji temeshi aru tsübua kazütsübaji masü saka marudangyongi tagütsüi aotsüla. Iba kasaji lokti tentet lanirtemia yimsüsür bushibaji tenla meshitsü kija atema masü saka yimten aser lokti khuret tokzüka jembitsü asoshi ajurutsüla. Tanü Nagaland nung lokti tentet aika lir saka lokti tentet aikati nübortem asoshi masü saka government nung alirtem sademsadema awazüdaktsütsü asoshi bilema inyaker ama inyaker. Iba jagi government-i meshitak inyakaka ola madoker. Asen lima akoksabaji yang nung jagi tenzüker. Atangji, lokti tentet tentetbaji government anemtsü tentetba masü saka nübortem asoshi tajung inyaktsü tentetba lir. Ajisüaka, lokti tentet lenirtemi government nung alirtemi inyakba mapatem teti mita melira government nung alirtemi aiben nübortem mapayui inyaktsü. Tanü tensa yimsüsürtemi yamaji inyakba agi nübortem timatemer aser alima telongi alur. Atangji, lokti tentet nung inyakbaji taa mali angati pei nübo, rongsen aser shisatsü tenla agüja inyaker dang lir, anungji aiben tetemsü lenir tajung aginüaka mangur. Ajisüaka, tanü putu tensa nung nübortem ajangzüktsüsa inyaktsü atema lokti tentet lenir tetemsü aser teindang nisung nüngdaker. Item jagi dang yimsüsürtema ajungshitsü aser aibelena oa alidang metongshitsütsü. Item ama lenirtem aser yimsüsürtem na tesendaktep junga lira alima ajungtsü. Atangji, Ao Senden ama tongtibang lokti tentet den tongteprateptsü asoshi yimsüsür ka mejetteta meshitetaka yimsüsür ajaki Ao Senden akümtsübua tesendaktep yajung yutetra, iba jagi Aor ajak mera akettsü aser Nagaland state timi anir otettsü. Aji oda, Ao Senden o Aor yimsüsür na tsüngda tsükchi atentsüsa mesüi kati ka akümtsübutepa nübortem asoshi kechi ochi aser kechi shitak ta asüba nung telemtetba agia nübortem anitsübaji Nagaland asoshi kanga nüngdaka kümogo.