Aor Tsüngremi mezüja shimtet ta ???

– I. Imdangkaba Ozükum, AGM BSNL.

1. Aor Tsüngremi mezüja shimtet ta asüba ya kechi mezütsü? Shiba dak mezütsü? Sentepji kiji Kodak kikümpang Tsüngrem o jembitsü aser kodaki yoktsü atema Temeshi soputsü sobur Tsüngrem külemtsü yanglu.
2. Sentep ki temeshi langpang ta jembir? Kechia temeshi langpang süra politics otsü telongpur temapur otsü jempir tangaribo mejembir mezüja shimtetba pur Aor temi jempir. “Heey mezüja shimtetba pur” kin kidong otsü, tama tesü aruba, yimküm otsü, ar amang raktep otsü agi sünger; ya Tsüngremi shimtetba kin na?
3. Ao lima Tsüngremi mezüja shimtet na? Tsükong tsükong tekubok temaba talakba telemsa mulungshisatsü maliama? Shidakba Aor Tsüngremi shimtetba na? Koa temelenshitsü ashi nung meyiper sempar aser arishitsü tenzüker, teshimtetba kin.
4. Aor mezüja shimtet? Ana danga putepa mali, shidak temulung nung shisadangang nai aser ni mezüja shimtetba nisung aser kin ka ama lir ta nai temulungjangi taitsüba mali lirma? Aor Tsüngremi palaka shimtet ta? Taka maki palaka shimtet ta?
5. Koba office nung Tsüngremi palaka shimtetsang aser shimtetla Aor Aotsür na tangari na asükümbaji mereprangnür, majinür, nai aser ni nungi nüdak adakatemer Tsüngremi mezüjaa shimtetna?
6. Aor Tsüngremi palaka shimtet ta? Tangar kin ajaki asenok sempar aser arishir teshimtetba kin na? Hooy Tsüngremi mezüja shimtetba kin tokolak masü tepen (tail) kümer palaka shimtetna?
7. Aor teshimtet kin? Tilabaia tuluba au ta mali tulubai tilar mangur teshimtet kin? Teraa jungshilema kümra asüküm agi sünger, mezüja shimtetba kin na? Tsüngremi mezüja shimtetba Aor Sentep kidangi marudangba mezüja shimtet ta?
8. Mezüja shimtetba Aor Tsüngrem tenzüker na? Temenen toteta sayutsüngitsü memetet tajung tajung dang jembitsü lai azüngtsü ano aji dang lepshia meyiper zünga tue alutsü, majung tuteta ashi nung tangar majung indang tejembi aji temenen ta? Shibai temetongshiba sembar paji tamaji saka shibai tartsüba agizüker paji shisataka. Mezüja shimtetba Tsüngrem tenzüker na?
9. Hay Mezüja shimtetba Tenzüker tajung nai jembibaji nai angateta jembirama? Nai jembidang tangar temoatsü ngudar ta nai ajitetdarma? Mezüja shimtetba na? Na teshimtetba tenzüker aser kin nü mapa jagi naji sayur, nü o jagi naji sayur ta aseni angateta mezüja shimtetba kin ji sayurama? Teshimtet kin na?
10. Status ji nungdak saka Tsüngremer statusji kanga nungdak, nütsüngtemi Yisu dang kodak yimli nung onok shiba tuluba asütsü ta asüngdang, Yisui tila tanur kecha memetet ka anir arur shibai iba tanur ama tila küma ajemaludir, pa tuluba akümtsü, shibai tulu kümnür pa tilatiba akümtsü aser shibai tilatiba kümdir pa tulutiba akümtsü mezüja shimtetba Aor kin na?
11. Mezüja shimtetba Kin, Tsüngremi palaka shimtetba Kin ta na? Centenary monger Aor Asentenshi:- Sobaliba Asentenshi, Kin kidong otsü asentenshi. Sungkong achiba asentenshi, Yimtsüng Yimtsüng nung Gate yangluer Süngyanglu Mangko tekolak Tenüm ozü Kye (Tiger) Shiti süngyanglu tapu tapu inoker Tsüngremi palaka shimtetba kin Yimtsüngji reprangang.
12. Kibuba amongnü tekülem kidangi arunür mali, Tsüngremi shimtet ta aseni jembir saka Tsüngremi shimtetba nübur kechiba tangari yamai sembar, palaka shimtet ta?
13. Kechi oset südir süang meimchir ajaki külemi dangbo meyanglur, nisung ka ajanga tama yanglur, yamaji Tsüngremer sendong ji Nisung ka Supongmeren Molongkimong nungerji tama Tsüngremi aja. Saka Aor mezüja shimtetba mesüra palaka shimtet ta asübaji menüngdak, alima jaka nung Tsüngremi ajartem tenüng aser nisung ka ka lir, saka ajabaji palaka aser shimtetbaji palaka aser mezüja shimtetbaji keni palala.
14. Mezüja shimtet tatepang sunga bener jembiteper, saka asen sasa Aor majung ta jembiteber, Aor atsüngzüka ao ta-a jembiteper, Aori temenen mena ta-a jembiteper, Tsüngrem o mezüng aruba education poktetdak jaka nungeshir lemangtemji Ak senzüdak aser alim kin aakatem atuamai Remote area Nagalandji reprangang 4 lane lemang tzü teperi tetsüngta nung mile talangka kümdagi. Joko palaka shimtet ta mejembili taktsüka. Ibai Tsüngremer tangatetba nung azüngertem moajangma.