“Aor yimtiba mokokchung nung bendanger yimmakertemi par konang nüngsang atema nüngshilong ka metonga ayuba jagi naga nunger meyirjangsa meyirjangi naga nüjiso atema pei taküm agütsüba puti otsü nembangdaktsür masü na ?

~ Tiala Imchen, Dmp.

Ayatai ! Ao Kin Süchia orr aliba nungi kodang ang shia arutsü ?. Menur asüyonga shisadangtsü nungdak ta bilemyong iba article ya Sensosanger ajak den lemsateper. Bendanger yimmakertemi (Assam Rifle, Indian Army) asen Aor yimtiba Mokokchung nung par konang tetushi atema Nungshilong ka “Veer Smriti Memoral” ta sür sayaba yakünü (2nd Feb’) osang kaket nung ngua kanga aoksaogo aser Mokokchung nung tU joko asen Aor shinga malia na ta tashi bilemogo. Kechiba süra iba mapa jagi 1950’s nungi tanü tashi nung asen tsüraburtem lakh-sa lakh-i Pei lima temeden asoshi noktakdang Indian sepai ket nung tesungmangtsü rishikangshia taküm jenti samaba otsü nembangtsür.
Iba mapaji anogo mesüra ita ka mapa masü, saka kümtem agia yangluba mapa asütsü. Sürabangla iba yangluba mapangji Mokokchung nung asen Aor lenla balala nung Lenir arkodong temi anir Yimsusurtem, mera taket Yimtsü Yimbutem, kenshi Oshi meteter tangatetertem, Kaketshirtem, aser nutsüng lakh anashi aliba rongnungi Kari danga mangu mesüra mangashi na? ta bilemer. Ano khen bilemtsübo yimmakertem jagi par lima nung masü bendang lima nung yanglur asünung Nagaland Sorkar yimsusurtem mesüra Mokokchung nung Lenirtem den jembiteper yangluba asütsü akok aji saka aseni memetet.
Saka kechi’ar sung, iba mapa yabo tsükchiri Ao kin mezüngmeshiba mapa kanga tejashitsü tulu lir. Kechiba süra iba Nungshilong yangluba nukjidongji kodang reprangdir 1955 nungi tenzüker yimmakertemi Naga lima nung telungpur den raradang parnok nisung 357 asüba atema yangluba lir. Nagaland yimtiba kohima nung war Cemetery ka lir aser Indian sepai-tem atema Nungshilong mezüngbuba Mokokchung nung yangluba ya lir ta Sayanuji sepai ketdangsuri ashiba osangkaket nung asenok nguogo. Item teyaksang o temji Nagaland nung Lenirtemi hau ta agizüktetter na bilemer. Kechiba süra Shingaia iba anemaji Ola madoker.
Yimmakertemi Naga nunger den rarabaji Second World War nung Kohima tongpang rara den kasa ama mebilemtsüla kechiaser Naga Puti otsüji khenyongi balaka lir. Naga nungeri India den war jazükba masü Pei Lima temeden asoshi nokdakba dang ta sepaitemi angatettsüla. Saka Indian sorkari Army aser Assam Rifles nem ration, injang teperi agütsüba den Havildar kati mashi temulung malemba nubu ka dak injang agi kasettsü ozüng ( AFSPA) tashiji onsara tulu agütsür yoka item yimmakertem jagi shirurua memeyong Naga nunger jenti rishikangshia sudaktsüba otsü temji tanü akümlir tsüraburtemi ashidang asen tenuk nungi nuktzü malui kodanga otsüji matemer.
Tanüa asen tendak kasa ozüng AFSPA jagi Naga nunger alena lir kümshia iba ozüngji extended dang supet sutsür saka Ola kata madokerji oda Naga nungerbo iba ozüng ya kangasa meimer sudi ta ang bilema tezü atanger. Iba ozüng tamajungji tang tashi magieni aliba agi 1994 küm Dec’ 27th anogo Mokokchung nung yimmaker Indian army aser Assam Rifles jagi asen nisung taochi makai temrepa kasetba den Mokokchung town nung mi senoktsür alemli Nungshi ki aser rongsen ajak metsü kümdakja rongdoktsü aser tashiyim agi tetsür taküm jenti raksatsü. Saka ano iba tia tensaji asen jakdang magieni lir ta nuburtemi kechiba tsürema mebilemer ta sungmanga aiben bilemer.
Bilemdangang ! Yimmakertemi parnok 357 asüba atemabo yamaji suoki yia bilemer saka parnokibo Naga nunger taküm lakh-sa lakh kaseta indokba, Ki-o-Jen ajunga metsü küma rongdoktsüba den meimchir memesuk rishikangshia sudaktsüba atemaji parnoki aibelenogo ta tanü tashi magizüker. Aben jagi ang tawa Nungshilongji par konang atema tsükchir lima (asen lima,) nungji kangasa tashi sayua yangluba lir. Itemji Ao Kin mezüngmeshiba mapa lir. Asen Ao yimtsüng kar nung Nungshilong yanglubatem Indian sepaitemi tepsatsüba otsü lir . Talisa tawa atalokba 2010 küm Mangmetong yimtak Nungshilong yangluba terenemleni aruba mapang ka nung Mokokchung nungi 9th Assam Rifle Commanding Officer Rohit Khare-i pa den Jawan 10 anir arua tepsatsü aser tebutiditem dang ammokmeren masü iba indang osangkaket nung adoktsüba atema Mkg nung Journalist tema sepai tanishirtem jagi parnok Camp-I jaoker kanga haras asüba tatalokbatem lir. Anungji iba mapa ya Naga nunger talisa Aortem mezüngmeshiba mapa tulu lir. Taji iba Nungshilongji tekaraba nung akosar indokang ta Ao sendeni anir state sorkari ozüng agütsütsüla. Aortem Politically, Socially, Religiously, Spiritually saktsü mapangji tongja tongogoni.
Tanü kaketshirtem ya asüng Naga lenirtem lir. saka parnoki lesson kaket dak alaka out book mazünger aser tetsü tebou den sensaksema otsü olem agazüktsü imdangi marur. saka ibaji tanü tsürabur kiyim lanutem tai ta research nungji adoker. Parnok dak alima meimba tanela maliba agi parnoki item senti otsüji angazüktsü mejangrarji kodaser Pei chir dang sayutsü. Joko asen tsüraburtem ajak sumadokerji item tatalokba otsü ashir mali iba den tanü kaketshirtemi kaket mazüngerji item rishikangshi otsüji memetet anungji tarutsü nungbo shibai metet, Naga lanurtemi yimmaker Nungshilongji ngur parnok nem akhum agüja anogo ka agiteta mungdi ta asütsüa kecha menua maka. AO LIMA NUKTZÜ KAKET nung asen tsüraburtem kechi koma rishikangshi itemji tongmelang agi kar shiogo saka Indian Army aser talisa asen kidanger Assam Police-i 1950’s nungi late 1970’s tashi asen tsüraburtem shirurua memeyong rishikangshiba otsüji zülur mezüluma otsü lir ta aseni angatetdi.
Joko asenok asoshi teinyaktsü kaji asüng lanu putui yashi asen tsürabur Walunirtemi “Par taküm Pei Lima asoshi bendanga agütsüba bilemtettsü ” atema tanü Ao sendeni ayongzüka memenui Mokokchung yimtiba nung Nungshilong kijaji masü saka MEMORIAL PARK tajung ka yanglutsüla aser iba park ji sen indokba tamakitsü masü. saka bendang lima nungia tereprangi arutsüsa kanga shisa kaa scope tulu nung yanglutsüla ta tebilemba ka lemsateper.
Tanü Putu nunga tesuiba asen tsürabur masüker Linuk meimer aika adokdakjangni ta Tsüngrem dang mepia iba Ocet züluba Kolem anener.
KUKNALIM.