Aor Zonizüng aser Ao Osep

~ S. T. Yapang Lkr., Kohima.

Ni Ao Senden Literature Board (ASLB) züngsem masü, saka khenkhen parnoki tenyatenpongba angar aser item ajak nung ni ngushia arubaji ASLB, AO Osep nung inyakertem ya taa talang tashi agia inyakba shinga mali, saka takokeribo pei talongtsü bener telok senden shia süngu ajemba nungi shir nüngtak timbaka pei nija sen agi küpdangtsür ibayongji tajunga ta süang tamajunga taa süang ASLB ta jashitsüsa tanü noktakteta lir. Ya Ao Senden-i nongloktsüba tashi angaba kija agibo tang aliba jenjang ya metongteti lila ta ni ngushia aruba ka shisemer. Aser teinyakeri koda belemseta inyaker itemji nüburia hau ta agizüktettsüsa nütsüng nübur ola anga inyaksangshiba ajanga dang rongsen teindokera talang aser nübu atsükera tebelem langa ta asütsü.
ASLB ajanga Zonizüng osangkaket nung anaben tashi yanglushia adokba ngua aruogo, ano tang nüburi majunga asür, aser majung asü agiang majunga ta ashir südi. Oshi/nüngjakoja kaji nüburi majunga süra/maginüra aji kechi sütsü! Anungji tang ya melenshira Aor Zonizüng küm ana semka tsüngda asemben melenshia adokshir asütsü, aser tasembenji adokyonga ajaki junger ta agizüktetla masütsütsü südi, kechibasüra tang osangkaket nung nisung aikati Zonizüng dak mulung masüba zülua ngudaki ano zülutsü südi, külen reprangdangra yamai asüba ajanga dang yim shia aser tzükong shiai koma ja liasüar metetjemer. Tang tashi nung Zonizüng dak sentakba tezülur rongnungi “pai ashibaji nia shitaka ta ashir onokia yamaji ajar” ta zülubaji kangara mali, saka nisung shiai tajung tesa balala aika shiogo, iba jaki ang asen Ao oshiji kibok nung takar saka yimjak nung sensaker ta jungkai adoker. Anungji tang koba neja aser yim shiai koda pei akaba rongsen tajungtiba tenlaa temai tuteta adoktsüogo itemji bendena katisa ashiba agi nung tajunga asüyonga tangar jaki hau asütsüla nübu aika mali, tang amshia aliba ya melenshidi ta asünunga anogo tenet nüngja kija süngla lottery nung shimtsü asü tzükong shia anogo kaka shimer tanüngba kaji lottery nung shimjar aji teinyaker asoshi khuretji ulura asütsü, kechiba süra Tsüngremi yangluba nunga süngla kidangsür ana külemi mepelateter, tzü maitsangi tzünglu arudaktsünür, saka tsük apusangi anü pudaktsünür ta shitakba nunga ajurushir, yamaji ASLB-i ajurudaki. Asen Aor alima mesama tashi ajaki obang ka sür junger ta shitettsüsa nüngjakoja amshitsüji tera asaktsü südi ta nibo repranga arur.
Ao Senden ketdangpur, Tzükong ketdangpurtem mesüra Aor telungjem jila balala nung alir ketdangpurtemi Ao oshi ojangtem mesüra nüngjakojatem züngshia kazütsüji mapang peria mangutsü südi, aser parnokji oshioben nung mongintem masütsü akok, kechiyong yimsüsütsü sempet dak rangloker parnokji ketdangpurtem shimba dangashi oshioben dak rangloker shimba masü. Joko tang tesüibaji aitsütepa kazü nung ajak takoksa dang anungji takoktsü süra tarutsü nungbo Ao oshi nung MA ajangteter alir rogo nem bendanga agütsüa reprangshidaktsür sülen dang tesüsa Ao Senden mendendi dang jaki aben nung ajisa kanga agi tajungba süla ta bilemer. Iba Zonizüng dak alia Ao Osep nunga keno tulu adoktsü akok, kechiyong Ao Osep yangluba ludeni nüburtem dang teshidangnüba aser temelenshitsü lira shiang ta osangkaket nung lenmang sadema lapoktsü, aser tang tashi shingaia parnok tenüngsanga adoka mali mesüra kanga jungerko ta shia mali, saka kari Ao nung MA akoshia renemer paika lir kechisünung Ao mazünger rogoi Ao Osep yanglur ta, kari ojang ka nungi sentakba ojangtem koma kodasür zülumen balala agi lemsa amshir ta, kari ASLB ajanga adokba Tensenyim-1 kodasür nenoki alema aor? Nenok nem ojang taruk rasa ashitsü temelaba dang agütsüa alitsü ashi oshi melenshitsü tashi agütsüa malitsü anungji pei nem lemzüktsüba artsü adena ora yangji maksü aser lendong dang menatsü ta, kari Ao nung maliba ojang kodasür Aori mejembir sürnung itemi inok ta zülu, iba den Aor imkongi meja ta zülua jembia arur aji agi meperi ta kecha mali sürnung koasür Fungza ta inok, Aor imkongi jembiba agitsü asü yim ka kijai jembibaji lepa oa jembitsü? Anungji kuli küptok agi osangkaket nung nübur dang junger majung ta asüngdangba ka mekümdaktsütsü imlar. Joko junger majung shidangang sür nüburi shidanger tashi mangara yangjibo keno tenzüktsü jaokba ka mesüka akümer, kodang keno tenzükdir senchi menji ajangzüktsü melamelar. Ajimesüra ano oda pei nejai junger ta asüba jurila Ao Osep ang timba adoktsü akok, koba ajanga asen oshi tali dang benjatsü aser ajujir angümzüa lia nongoktsü amai ajurutsü.