Aor/Aotsür Kaketshirtemi ya ken bilemdangang

– Imrongsungba,  Arkong Ward, Mokokchung.

Alima kin (nation) ajunga nung kaketshir ola ya kanga tesashi aser tashi tait. Alima kintem mapang balala nung tensa mamakshimak aser tatayuya alidang kaketshir telungjemtemi kechi tetuyuba agütsür aser kechi südaktsüner aji sorkari arok-aroka shisadanger külen sabang nung benoka jembir. Naga lima nunga, mapang shia tensa balala ajurudang, aji oda, kaketshir telungjem nungi tebilemba tajung aser lenmang sayuyim balala sorkari angadanger; kaketshir tashi ya onsara tulu. Alima nung aliba lokti tentet aser sorkar balalatemi kaketshir ola tematiba nung akhümtsübur aser ano parnok nungi shisatsü tajung aginüa tzürar. Tanü asen Asia litsü telungtet nunga tensa tamajung aika ajuruba aser item teraksatem kaketshirtemi lirumedema bentettsü achaayanga inyakba aser ano takok tulu ngutetba asenok ajaki osang kaket balala nung züngshia arudar.
Süra, tanü asen Aor/Aotsür kaketshirtem kechi jenjang nung noktaka lir ?
Ao Kaketshir Mungdang (AKM) aser Tzükong Kaketshir lenirtemi parnok senti nübu den külemi anibelem, nüngsen aser timtem jenti ajuruba mesükshii mungdang takok tulu ngudaktsüa kaketshir mungdang agia arudar. Kaketshir mungdang, AKM mesüra tzükong, ayongbaji kaketshir shia nem shisatsü lenmang balala nungi ajangzükdaktsütsü nükjidong tulutiba nung amendaka yur amunger. Kaketshir mungdang atema tongti o jembiri anir shisalen sayur aser temedanger nübu tajung aika jaoker. Ano kaketshir mungdang nung adentsü pur atema senti rongsen jenti lalua mungdang ki mesüra chiyungtsü aser tenüngdakba maparen ajak akok tashi kaketshir ketdangpuri tematiba/tajungtiba jenjang nung anepalutsür. Kodang asen Ao kin kaketshir mungdang o Naga kin balala kaketshir mungdang agiba yimya metemdangdir asen Ao kin kaketshir mungdang amungba yimya ya sa tajungba aser tematiba lir.
Saka Aor/Aotsür kaketshir mungdang nung adeni aor züngsemtem dak tongtibang yimya tamajung kar yamai lemsateper ;
1. Mungdang sentong tagidak nung mobile phone -ang amshitsü temulung agütsüba
2. Sentong adeni mapang menur aoba aser sentong tagidak nung kima- yimdong penzüa kazüa senzüba
3. Anepdang aser anüngdang sentong nung adentsü melena medemer o medemer jateper mungdang yim penzüa kazüa senzüba
4. Aonung tepiyong medemer o medemer tsüngda pei tanendak takdang nung junga memejangi otsü longteper aser ibaji ajanga anüngdang sentong tagidak nung anünüba
5. Saisapong aser kenten-menü sentong nung ang dennüba
Aor/Aotsür kaketshirtem dak item yimya ya ali tashi nungbo tangar kin meneptsü ano talangka lir. Tejakleni aoba (forward) temaitsüji mobile phone tajungtiba amshiba aser sobusolemtsü tematiba jenjang nung asemba den kulemi tang rongdak tebilemtsü aser teinyaktsü balala atema nai/ne pei akokba shisatsü tajung agütsüba (solution) ajanga asen alima nung temelenshi kechi bener arutsür. Ayah! Süra, mungdang nung medeni kima-yimdong nung senzüba jagi nai kechi angazük? Na kechi atema ne senti mapang tajung lalua mungdangi ao? Nai kaketshir mungdang ka akaba tetezüji junga angatetta lir mali? Tawa 67 buba Ao Kaketshir Mungdang, Changtongya yimtiba nung amungdang, lenir kati “shinga teka tazüng tou, iba kaketshir mungdang ya Hornbill benjong masü, saka Aoli tashi tawar senden ka lir,” ta ashiba nung tu tebilemdangtsü aser temetongshitsü tajung kaka agitsüla.
Hau, tanü putu nung na/ni adenba kaketshir mungdang osangji osang kaket balala ajanga peria angutsü saka aji agi teperi masü. Na/niji züng-zünga aser tenyok-tenyoka mungdang nung adentsü tim. Mungdangibo ao saka tangazükbabo kecha maka. Sürabangla, iba amala yimya tasen ya asenoki benshi tashi nungbo AKM mesüra tzükong kaketshir mungdang ayongzüktsüji kecha tenüngdaktsü maka ka kümdaktsür.
Kodang Naga nunger kaketshir tsütsü orr reprangdangdir asen Aor/Aotsür kaketshiri kechi ashir aser bilemer (?) ta asübaji aiben tensa tajung-tamajung balala ajurudang tongtibang ka akümer (quintessence). Aor/Aotsür ya khen jung-junga shisadangra asen teyanglur Tsüngremi ata-mata shisa taka moatsü masü. Asen Ao kin kaketshirtemi zülua jembiba aser shisadanga inyakbaji tanga Naga kin ajungai inyakba dang nungi tematiba asür. Tsüngremi agütsüba shisatsü den külemi na/kü dak aketba sempet tajungji amshia Kaketshir telungjem balalai ayongzükba sentong nung shilem tajung agitsüji onsara tongtibang ka kümogo.
Tanü Ao lima tia (overall) reprangdangra, Aor/Aotsür kaketshirtemi lungjemer asen lima asoshi mapalem tajung ajanga shilem agitsü wadang aika anendaka kar. Item teraksa bentettsü ya asen tsürabur kisung khuret masü saka asen kaketshirtemi-a shilem tulu agitsü nüngdaker. Aor/Aotsür kaketshirtem, ano ken temzüng-medemshir (reset) telungjem nung alima khuret abentsü Tsüngremi yariang.