Aortem mapang

Naga lima nung alirtemi Tsüngrem temeim memetet aser alima tejakleni aoba sobaliba mangu tamang tia nung aliba mapangji Aortem mapang liasü. Iba mapangji Tsüngremi Naga nungertem asoshi temeim mapa tajung inyaktsü Aortem nem moatsüba mapang liasü. Atangji, iba mapangji nisung tsütsü bilemdangdi süra mapang tajung masü saka timtem agitsüba mapang liasü. Ajisüaka, Tsüngremisa asen tsüraburtem nem tangatetba tajung agütsüba agi, kecha marendak aser metsübui mapang tamajung agi mapang tajung küma inyakogo. Iba sülen mapang talangka Aortemi alima tsütsü dang bilema jangratema anisüngzüka liogo ta bilemer. Atangji, Nagaland yimten yimsüsüba menden nung Aortem menden tajung athaba mapangang Aortemi Aortem mapanga ta bilema alitsüa akok saka tanü asenoki meyipa reprangdangra, asenok menden tajung nung anisüngzüka amenba mapangji asenok asoshibo mapang tamajung liasü ta angatettsü. Asenoki tangar asoshi timtema ali tashi Tsüngremi asenok moatsüogo. Ajisüaka, iba temoatsü manung alidang asenoki Tsüngrem temeim amadoker, tangar tammang tia nung alir yarirtem to agi tangar memeimi pei kija ajungtsü bilema inyakba agi tanübo asenoki asenoksasa asenok agi tenük masüng kümogo ta angatetter. Iba tensa tia angatettsü atema taoba hopta nung, asenoki ” Nagaland nung Aortem ya mali nunga koma süla ?” ta asüba onük ka nung shisadangogo. Atangji, kodang Naga lima nung ya Aor mali nunga koma süla (?) ta tasüngdangba ka arur, jet ta Aor mali nungbo Naga nungertem aika tang tashi Yisu temeim osang tajung mangashii lila ta aika mulungjangi arutsüa akok. Mesüra Naga lima nung Aor malika asünunga Naga nunger kin aika tang tashi kaketshisatsü mengui lila ta shitettsüa akok. Item tebilembatemji shingaia nunga ta meshitettsü südi. Aji oda, Aortemi Aor mapang nung mapa tajung inyakba tejangji tang Naga kin aika nungi Aortemi sayutetba lenirtem aika yimten, lokti aser arogo nung shilem agia angutsü. Ajisüaka, asenoki inyaktetba mapa tajungtemji amadoker tanü asenok dak temeim melen tesempatep shisatsüang ali ama asenoki jembir aser angur. Ibaji shitak süra Aor asoshi mapang tamajungtibaji tang ya asütsü. Aor asoshi mapang tamajungji Nagaland nung Aortemi yimten nung tongti shilem magitetbaji masü saka Aortem putepa melitetba aser Aortemi temeim agi tangar asoshi mapa tajung meinyaktetba mapangji asütsü. Küm 40 jakdangbo asenoki pei kolak nung pei khu bener tetsüng agi memetetba purtem alidak tesem tonga oagi parnok tanüla aser shi taküm kümzüka nüchi kümtsü. Ajisüaka, tanübo asenoki gari nunga oagi nüngdakba purtem meyariner. Tanü Aor lanurtem ya akhidang Naga lima tammang tia nung aliba tesemtem sangwadakja Tsüngrem mapa inyaker chirnurtem memesük kümogo. Aikati asenok dak tenükmerem lir ta jembir, aikati Naga nungertem rongnung Aorsa ochimashiba aser tasü maitba ta jembir aser aikati Aortem ya akhidangbo taochi aketba kin ka liasü saka tanübo tashiyim amshiba kin ka kümogo ta jembir. Item ajakji asenok dak aketba tashimaittem lir. Item tashimait jaklatemji asenok dak ali tashi asenoki Naga nunger asoshi mapa tajung meinyaktettsü. Tanü ya Nagaland nung Naga nunger asoshi mapang tamajung kati tongadokogo. Joko, mapa ajak tangatetba agi masü saka tetsübuba agi aser rongsen penbuba agi, timi masü mashileni tatsübalen apia inyaker. Idangji, inyakyim nung tapok aika adoker aser item tapok nungji tagitsülaba rongsen aika samadoker. Ibai Nagaland yanglushisüba mapang lir. Aji oda, memetet aliba metetdaktsütsü aser amang tia nung aliba sangwadaktsütsüba mapangji Aor mapang asü süra, tanüa Nagaland nung Aor mapang ka aruogo. Aor mapangji Nagaland yimten nung tekolak akümtsüba mapang masü saka tila kümer pei rongsen, pei nübo aser pei shisatsü agi tammang tia nung alir nüngdakba purtem tonga oagi yaritsüba mapangji asütsü. Aor mapangbo tangar nem tenzükdaktsütsüba mapangji masü saka tangar tenzüktsüba mapangji asütsü.