Aou yokdoktsü atema lenmang bushitsüla: TR Zeliang

Dimapur, November 28 (TYO): Nagaland Bamboo Development Agency (NBDA) indang 9 buba Governing Body senden tanü Chief Minister indang Residential Office nung amen.
Senden nung Chief Minister aser Governing Body Chairman, TR Zeliang-i o jembidang, NBDA-i marketing sector nung jenjang tajungba akümtsü atema temelenshi nüngdaker, ta ashi.
“Asen state nung aou atemba mapa kanga tulu inyaker anungji asenoki aou yokdoktsü indangjia bilemtsüla” ta pai ashi.
District 11 prongla nung NBDA-i Village Council, aluyimer, SHG, kija aser teloktemi shilem Bamboo plantation mapa inyaker. Ajisüaka, aou aser aou agi yangluba osettem yokdoktsü atema tetsükdaktsü ajurur.
Nagaland kübok tezülen oa aliba district tem nungi kidanger state nung processing plants-i aou belendang sen aika endoker aser ibaji ajanga sorkari tajangzük balaka mangur aser shishilembartemia aiben takoksa ajurur.
“Asen state nungi tangaleni sen aika bener aotsü melena asenoki asen state nung processing plants amenoktsü atema nisungtem bushitsüla” ta TR Zeliang-i ashi.
Nagaland nung aou indang Small Scale Industries lapoknürtem pelashishia jaoker aser iba ya ajanga asen state rongsenkettsüng jenjang atuba den külemi mapa inyakdak angutsü, ta paisa shisem.
“Asenoki aou atema Mini-plants aser Small Scale Industries lapokba company tem jaoktsüla” ta Chief minister-isa metetdaktsü.
Tanü senden nung October 3, 2016 nü NBDA indang Governing Body senden nung jembiba onüktem benoka olemtep aser Team Leader, Peter Lichamo-i NDMA ajanga inyaka aruba osangtem Power Point presentation ka ajanga metetdaktsü.