Aowli Benjungmong

Taküm küm asenok ajak asoshi osang tajung kaji Watsü Mungdangi December ita 6 nü nungi Mokokchung nung anogo asem atema ayongzüktsü renemba Aowli Benjungmong amongtsüba osang ya asütsü. Asen lima nung lokti tentet aika tenteta lir saka nübortem ajangzükdaktsütsü asoshi mangdang tajung yur nendaknendaka inyakba telokji Watsü Mungdang ya ka asütsü. Aowli tetezü tensa tia ajak tizükteta metitemi bener aoba dang ajar ta angashidang, benjong monga nübortem ajangzükdaktsütsü merangba dang masü saka Ao oshi nunga ano olong ka agi takarba kümdaktsüogo ta pelaa bilemer. Akhidang nungi asenok tsüraburtem dak sempet aika keta liasü. Azüngtsü aser zülutsü memetetaka aluyimtsü asoshi ita anü repranga anogo takzüktetba, süngküm aser aou agi kidang nüngdak oset yangluba aser olaangla mapa agi aben süoshi renemba mapatem ajakji asenok tsürabur shisatsü aser tekolok nungi adokba mapatem liasü. Ajisüaka, tanü asenok lanurtemi item ama tsüraburtemi inyakba mapaji tanü putu dak apet technology inyakyim ajanga tajungba küma inyaktsü melen tesamaleni odaktsür. Atangji, asenok ya ajungbena ka dang tashitemetetter akümba agi asen tsüraburtemi inyakba mapatem ajak ajungbena toktsür tsümar aser temesüng nisungtem sobaliba dang nükshia parnok jilu aitsü tenzük. Ibayongji, tanübo asenok tsümar-a masü aser Aor-a masü ta tom nung kecha inyaka mashi aser memetet timtemba purtem aika lir. Asenok tebilemtsü ajunga agi government mapai aitsü aser ita sen agi asen nüngdak ajak tsümartem dang alia achitsü aser agitsü ta dang bilemer. Tanübo iba tebilemba aser tangatetbaji melenshitsüla. Watsütemi Aowli benjungmong sentong ayongzükba ajanga asenoki asen dak aliba tashi aser sempet reprangteta item jagi rongsen küma yanglutettsü lenmang aika angutsü imlar. Aji oda, tsüraburtem mapang nungi inyaka aruba mapatem aika shia arudakja inyakba ajanga asenoki rongsen aika yanglutettsü. Tsürabur mapang yongsen mapa inyakba ajak nok agidang inyaka aru saka tanübo yongmechitsübaji machine agi mechir. Iba amaji akhidang tsüraburtemi teka kisüng agi inyakba mapatemto tanübo asenoki machine tapu balala agi yanglutettsü.  Item machine-tilatemjia tangari yangluteta akaba alitsü dang mebilemi asenoki asenoksasa purapiteta alitsü bilemtsüla. Iba kasaji akhidang ali chipo teka agidang tepa aru saka tanübo itemjia inyakyim balakati tekaraba aser tajungba yanglutettsü. Tsürabur mapang ali chipo nung asobasa tajungba aser temelaba amener ta jembia angashi. Iba tajungji asen senmang kümer asenoki ali chipo nung soruchiokba hotel lapoka chiyongtsü ayoktsüa akok. Iba amaji mapabo akhi tsüraburtemi inyakba saka inyakyim tajungba kümer asenoki inyak tenzükba mapang ka asenoki tenzüktsüla. Iba mapangji Aowli benjungmong ya ka asütsü. Asenoki jungjunga bilemdangra, tsümartemi lenmang lenjang nung chana lon mesüra pani puri amala chiyongtsü ayokbabo raktepa achir saka asenoki item mapatemji ajizüka inyaktsü mebilemer. Tsümartem lenmang lendi nung jangpok kisüng poka ayokba agi kibong mesüa alir. Iba amaji, tsümartem inyakba mapatem asenoki reprangdangra, lenmang lendi nung süngo aser chiyongtsü yanglua ayokba kisüng agi parnok taküm alir. Item mapatemji asenoki anogo asem pezüka alitsü ayongzükba sentong, Aowli benjungmong ama nung ayok tenzüka teti asoshi asen mapa küma inyakra asenok aika ayongayonga anisüngzüka alitsü. Asenoki süngo amtsük terara yanglua ayokba nung mangmanger mesüra aonsutsü tsüki tilala yima yang nung jagi züsentetba aonsutsü ayoktsübaji tezüdanga bilemer. Ajisüaka, asenoki metettsüba kaji, mapa ajak tilaka nungi dang tenzüker. Ibaji Tsüngremer ozüng. Tila ka nungi dang tulu küma azükarutsü. Asenoki asen tsüraburtemi meinyakdangba mesüra shingaia meinyakba mapa tuluka inyaktsü bilemtsüa akok, ajia junger, saka azükarua inyaktettsübaji shingaia meinyakba mapa ka inyakba nung masü saka tangari inyakba mapa kasa ka saka  inyakyim balaka nung tajungba inyaktetba ajanga takok ngua azükarur. Iba tangatetba nung putu tasen ka Aowli benjungmong alidak nungi tenzüktsü imlar.