Aoyimsen Baptist Arogo nung ABAM Social Concern training agi

Dimapur, Tsüklai/Feb. 15 (TYO): Aoyimsen Baptist Arogo nung February 14 aser 15, 2019 anogo nung ABAM Social Concern Training Zone 8 aser 9 kanga takok ngua agiogo, ta ABAM Executive Secretary sangdong ka ajanga ashi.
Iba training sentong nung arogo 24 nungi sannüker temi anir toklang tenzüker aser lim arogotem social concern committee züngsem 71 tashi arua shilem agia liasü. Training nung shisalen sayur ya Maong Jamir, Asst. Director Prodigal Home, Dimapur liasü.
Training mapang arogo balala nung lokti tebilemtsütem asadanga item tebilemtsü arogoi koda anepalutsü nüngdak ta tangatetba agüja kanga temoatsü ngua agiogo, ta sangdong nung shia lir.
Iba training sentong tatembang session nung Lipok Jamir, Pastor Diphupar Ao Baptist Arogo ajanga Nehimiah kaket nungi Yirusalem jara yangluba athishia, asen Aor tesem ajak nung merüktetsü mapang tongogo, anungji arung tanü nungi asen lima anepalu tenzükti, ta ayongzüka sentong tembang.
Iba sentong tulu tiptema achaayangba asoshi ABAM ajanga Aoyimsen Baptist Arogo dang kanga pelar aser Tsüngremi Ao arogotem lokti tebilemtsü mapa inyakdang asen lima nung temelenshi atokdakjang ta ABAM sarasadem ayur, ta ABAM Executive Secretary sangdong ajangasa ashi.