Aoyimti putu menden ajanga nüburtem dang metetdaktsür

Dimapur, Rongchii/April 12 (TYO): COVID-19 tashidak wara prokshiba nungi nüburtem kilung nung kümzüka alitsü asoshi Aoyimti putu menden ajanga akokba mera ajang agia inyaka arudagi. Yamaji nüburtem senzüsembongba nokdangtsü aser yimtsüng telungi tangar maitdaktsütsü aser yimtsüng nung alirtem nüngdak makaba nung yimtsüng alema meyoktsü mechi tongtibang tesem balla nung CCTV camera inoker mita arudar, ta Aoyimti village council chairman, Imnukloba aser secretary A. Polongnok Lkr nati sangdong ka nung metetdaktsü.
Iba ama mera agiba ajanga linük ajunga shibangba maparen shidak inyakba kisüng masü saka anasa aliba Airport kümzüka ayuba nunga teyari agütsür, koba resources atema tang asoshibo ibai dang lir, ta sangdong ajanga ashi.
Linük tesem ajungalen shibangba (lockdown) sülen yimtsüng kübok lokti tentet balalai tongti shilem agia timtem nung alir aser makamaitertem yaria arudagi. Lokti tentet dak alaka kija-kibong temia molungsoa yariteper. Iba ama tensa ka nung nüburtem lokti nungi pila alitsübaji (social distancing) kanga tongtipang aser maneni nüburtemi yamaji inyaktsü ayongzüker, ta sangdong ajangasa ashi.