Aoyimti sensosangertemi election timi agitsü lemtet

Dimapur, Nov.26 (TYO): Taruba state assembly election nung senso ajaki ochishia shilem agitsü asoshi tanü Honibar nü Aoyimti yimten, Arogo, watsü aser lanur telongjem teloktem külemi adenshia telemtetba agiogo aser itemji mapa küma inyaktsü atema Aoyimti Clean Election Action Committee (ACEAC) ka shimogo.
Tanü Aoyimti Baptist Arogo tenla kidang taruba election timi agitsü asoshi shisalemsatepba sentong ka nung yimten, Arogo, watsü aser lanur telongjem teloktem nungi lenirtem adenshia Tsüngrem aser nisung tsüngdang taruba election nung Aoyimti nung alir sensosanger ajaki pei vote pei-i enoktsütsü aser shingaia kechayonga pei vote mayoktsü ta tenangzüktepba ka tezüluba nung yuogo.
Iba tenangzüktepba nung parnokisa lemtetba agi, taruba election nungbo election-i air candidate-tem ajak külemi jar sabang ka nungi parnok election-i aiba nükjidong nübortem nem shidaktsütsü aser election nung adokra nangzükba inyaktsü asoshi tezüluba nunga nangzükdaktsütsü.
Joko, taruba assembly election nungibo Aoyimti telongzük nung shinga yimten teloka camp memesemdaktsütsü, nübortem mesüzüka senotsü aser temesepba chiyongtsü khenyongi mamshidaktsütsü ta Aoyimti sensosangertemisa lemtet.
Ano, par yimtak dang masü saka tangalena election timi agidaktsütsü nükjidong nung Aoyimti sensosangertemi tangalen tim masüba mapatem inyaka election nung shilem magitsü parnokisa lemtetogo.
Taruba election nungibo electoral roll merüktettsü aser shingaia tangar tenüng nung vote agütsütsü memelatsü aser Arogoi sangküm küm piyong election timi agitsüba dak sendakba nung nübortem nem tangatetba aser tanüla chiyongtsü agütsüba sentong ayongzüka akatsü ta Aoyimti sangertemisa lemtetogo.
Ano, parnokisa lemtetba tajung kaji, election anogo nung presiding aser polling officer-tem nem ACEAN purtemi dang süngo agütsütsü, anungji yimten telok shinga nema süngo agütsütsü memelatsü ta lemteta lir.
Iba ACEAC nung Aoyimti Arogo, Village council, Watsü Telongjem, Lanur Telongjem, Kaketshirtem telongjem aser Arogo nung lanurtem den Movie 3 Project Team adentsü. Iba committee ya December 15, 2016 tashi nungbo tentettsü telemtetba agiogo.
Aoyimti ya Dimapur district nung Aor yim tuluka lir. Iba yimtak tang kilen ajak agi 530 shi lir aser Ghaspani 1 Assembly Constituency kübok lir.
Tanü iba “Clean Election” onük nung shisalemsatepba sentong nung shisalen teyur Oriental Theological Seminary nung tesayur Dr.Pangernungba aser Tir Yimyim yimozülur Wb.K.Temjen Jamir na liasü.