AP Angh-i sorkar raksatsütsü meranger: Sonia

New Delhi, Dec. 16 (Agencies): Bodhbar nü Congress Party Tir, Sonia Gandhi aser party nung lenir taintemi Tir, Pranab Mukherjee ajurua Arunachal Pradesh chief minister aser Angh na tsüngda mangatettep adoka aliba aser assembly tensa indang metetdaktsüogo.
Tir Pranab ajuruba sülen osangbenertem den jembidang Sonia Gandhi-i, “Arunachal Pradesh nung Congress sorkar raksatsütsü merangba atema onok tejashi aser tebilemtsü metetdaktsütsü atema onoki Tir ajuruogo,” ta ashi.
“Temzüng akhümket kümzüka ayutsü atema onoki Tir teyari meshiogo,” ta laisa ashi.
Arunachal Pradesh Angh Jyoti Prashad Rajkhowa-i inyakba maparen anema tanep Congress züngsemtemi, state Angh-i inyakbaji democracy aser linük Temzüng tepsetba lir ta shia pa menden nungi agientsü takhangba agütsüba ajanga Rajya Sabha senden junga magiteti liasü.
Iba onük benoka Opposition Lenir Ghulam Nabi Azad-i, Angh-i asükwa mongpu senden jazükba aser state sorkari memepishiaka onüktem lemtetba ajanga state sorkar aser legislature maparen nung jangjonger, ta ashi.
“Arunachal Pradesh Angh-i kijai tashi amshir ka mesüka inyaker. Iba ya democray dak khenyongi mapet, aser iba ama inyakyim ya British nunger yimsüsüba mapang nunga matalokdang,” ta Azad-isa ashi.
November 3 nü tetuyuba nung, 6buba Legislative Assembly sangküm January 14 nungi 18 nü tashi agitsü shia lir, ajisüaka Rajkhowa-i ibaji melenshia sendenji tanü nungi December 18 tashi agitsü ayongzüka lir.