AP, Assam aser Tripura nung by-election agiogo

Itanagar, Guwahati/Agartala, November 19 (Agencies) : China arrtsülen aliba Arunachal Pradesh (AP) kübok Anjaw district, Hayuliang constituency nung Honibarnü secutiry kanga sashia lia by-election agidang nisung noklang nung shilem 72-i shilem agia liasü.
Iba polling anepdang 7:00 nungi tenzük aser kecha timtem melii tenbangogo, ta Deputy Chief Electoral Officer D J Bhattacharjee-i ashi.
Iba election nung candidate anaprong den district electoral officer, returning officer aser Election Commission nungi yokba general observer tem ajak tetsür dang asübaji AP election otsü nung tan mezüng lir.
North East Democratic Alliance (NEDA) nungi candidate Dasanglu Pul BJP ticket nung aser Independent candidate Yompi Kri na atema agütsüba vote temji Electronic Voting Machines (EVMs) 81 nung lir.
Dasanglu ya tesüiba mapang state chief minister, asür Kalikho Pul kinungtsü asem rongnungi tanutsüla lir. Iba constituency nung voter 11,003 nungi 5,508 bo tetsür lir. Polling station 81 rongnungi asem — Kibitho, Aphumna aser Taflagam — China international arrtsülen lir. Iba seat ya taküm August 09 nü Pul alenseta asüba sülen azüngtetba lir.
Ano Assam nung Lakhimpur Parliamentary constituency aser Baithalangso Assembly seat atema voter noklang nung shilem 60.93-i shilem agiogo.
Shilem 60.93 nungi noklang nung shilem 60.83 Lakhimpur aser shilem 65 Baithalangso nungi liasü, ta Guwahati nung Chief Electoral Officer Mukesh C Sahu-i PTI dang ashi.
Lakhimpur nung voter 15,11,110 aser Baithalanso nung 1,80,203 lir.
Lakhimpur parliamentary constituency nung May ita Majuli constituency nung state Assembly constituency nung Chief Minister Sarbananda Sonowal takok angba ajanga iba menden azüngtet.
Baithalangso nung Congress MLA Man Singh Rongpi-i July ita party toktsür BJP den adenba ajanga pa melen iba election agitsüsa aküm.
Lakhimpur nungi candidate pungu — Amiya Kumar Handique (CPI-M), Pradan Baruah (BJP), Hema Hari Prasanna Pegu (Cong), Hem Kanta Miri (SUCI-Communist) aser Dilip Moran (Independent)– toktep aser Baithalanso nung candidate asem — Mansing Rongpi (BJP), Ruponsing Ronghang (Cong) aser Rajen Timung (Independent) — toktep.
Tripura nunga voter 78,400 nungi noklang nung shilem 90-i vote agütsüogo, ta ketdangseretmi ashi. Iba by election ya Barjala aser Khowai assembly constituency tem nung agia liasü.
Barjala seat ji Congress MLA Jitendra Sarkar par party pur den telung nung meputep adoka June 6, 2016 nü mapa nungi anenba ajanga agitsüsa aküm aser Khowai seat ji CPI-M MLA Samir Deb Sarkar asüba agi agitsüsa aküm.
Constituency anaprongla nungi candidate pungugui toktepa liasü.
Tanü agiba by-election indang vote temji November 22, 2016 nü azüngtsü.