AP-i North East India Fashion Week ayongtsü

New Delhi, July 15 (Agencies) : Northeast (NE) nungi sütaker aser designer tem pei sempet sayutsü maongka agütsüba sentong, 2buba North East India Fashion Week (NEIFW), Itanagar nung August 19, 2016 nü nungi tenzüka amungtsü.
Ano taküm küm tatemlen London nung NEIFW Collection ayoktsü atema dokan balaka lapoktsü.
August 21, 2016 nü tembangtsü aliba NEIFW sentong ajungkettsü atema Brihostibarnü fashion sentong ka ayongzüka agiogo.
NEIFW nung Chief Operating Officer, Designer Yana Ngoba Chakpu-i, “Ni northeast tesem nungi designer ka lir aser iba tesem nung sü atakertem den tongtepratepa inyaker. NE nung sütaker ishika dang kümogo, anungji Meghalaya, Mizoram aser NE tesem balala nung sütakertem onoki ajungshir. Tan akatsü aliba sentong nung designer aser sütaker parnok nisung 25 shii shilem agitsü renema lir,” ta IANS dang ashi.
NEIFW sentong nung Bihar nungi designer Bansala Mishra aser Rajasthan nungi Archana Kabra nata arua shilem agitsü.
“Bansala-i NE kanga meimer. Lai eri aser muga silk na amshia kechisarena design süa lir. Archana-ia kechisarena design asütsü atema eri aser muga silk na amshir,” ta Chakpu-i ashi.
Chakpu-i yaküm küm AP nungi designer Nabam Aka den lokteper London Fashion Week atema design kar yoka liasü.
London NEIFW Collection ayokba dokanji taküm September ita nung lapoktsü, ta lai ashi.
“London Fashion Week nung shilem agiba sülen sü atakba kanga sapua kümogo. Ni yangluba kija masü saka tanga designer temi yangluba dena lokteptsü ni bilemdar. Designer shiba NEIFW nung tenüng züluokdir parnoki yanglutetba design tem iba dokan nung sayutsü maongka angutsü,” ta lai shisem.
Assam nung nüngtugu actor Adil Hussain-i NEIFW atema brand ambassador asütsü maongka anguba atema kanga pelar.
“Iba amala fashion sentong ya nüngtugu nisungi ajungkettsüba tajungba lir, kechiba süra parnoki item design meimba ajanga nüburtemi memeteti sapuatoker. Iba denji külemi item design ya tang kanga bulua amshiteper aser temang nung sübotsü kanga junger. Designer aser sütaker tem pei mapa asoshi sen tajangzük angutsü nüngdak anungji nüburtemi item asüoshi alitsü ni ajungshir,” ta ‘Life of Pi’ film nung shilem agisang, Adil Hussain-i New Delhi nung osangbener dang ashi.
Nagaland nungi tesüiba mapang Mr. India International contestant Opang Jamir-a iba ajungketba sentong nung dena liasü.
Designer Arita Kashyap (Assam), Rupert Lynrha (Meghalaya), Karbi südaker Rohila Engtipi aser Mishing sütaker Koombang- TheStorm nungera kasa sentong nung denogo.