AP nung anentsüh ajanga nisung 2 asü, nisung tasür 19 kümogo

Itanagar April 23 (Agencies) : Tanü Honibarnü Arunachal Pradesh kübok Tawang district nung ano anentsüh tasen aluba mapang tajemba agi nisung ana (2) süogo aser talidak ki aika raksatsüogo. Hokolbarnü asüba zünga Tawang district nung tawa tsüngsang mopung tesashi aser anentsüh agi asür nisung 19 jungogo.
Iba anentsüh ya Tawang nungi kilometre 20 pilar aliba Thongleng yimtsüg nung alu, ta ADC Lod Gambo-i ashi.
April 23, 2016 nü aluba anentsüh agi ki 30 anüka raksatsü aser tasür ana aliba kijibo meshimeshia samatsü, ta Gambo-i ashi.
District ketdangsertemi nisung tashi aser kol amshia anenbanger aliba agitetba mapa nung yaritepdar, ta pai ashi.
Tasür nisung 19 rongnungi kabo Namsai district kübok Jengthu ayong nung April 17, 2016 nü asüba dena lir. Tzünglu maneni aluba ajanga yashiang (Brihostibarnü) Tawang küboksa Phamla yim nung anentsüh tulu alua nisung 16 anensetba sülen tanü iba lendong ya atalokerba lir.
Yashi asürtemji timba ka Assam aser Nepal nungi arua ayangertem liasü.
China arrtsülen aliba Arunachal Pradesh tesem aika nung tzünglu manendangi aluba ajanga anentsüh kanga bulur.
Union Minister of State for Home Kiren Rijiju-i tanü Tawang nung atalokba osang tejangja agia nüngdakba mera agitsü telemtetba agiogo.
Tsüngsang mopung kanga majungba ajanga chopper meyimtetba agi Tawang nungi Itanagar tashi Rijiju gari nung oa liasü.
Chief Minister Kalikho Pul-i tang state tensa asadangdar aser pai state nung deputy commissioner 18 den yashi (Brihostibarnü) phone ajanga tzümetsüng osang agitepogo.
District timba ka nung tang ya tzüngmetsüng tensa agi menepa lir aser tasüba timba atalokbaji Tawang district nung lir. Iba den külemi Anjaw, Changlang, Lower Subansiri aser East Siang district tem nung tzünglu kanga sashia aludar.
Chief minister-i DC tem dang kanga osang ola angadanga aser District Disaster Task Force renema aliba den tzü tajemtsü, mozü aser chiyungtsü peria rizünga atatsü tetuyuba agütsüogo.