AP nung arishi küm 13 tetsür ka kinungbo den bala

Itanagar, June 24 (Agencies) : Arunachal Pradesh East Kameng district nung alir arishi küm 13 tain ka kangshia kibong kümdaktsür aliba jena ao. State nung yim kar nungbo tang tashi tanur asüdang kibong kümdaktsüba yimya meindok lir ta iba tatalokba ajanga puteter.
East Kameng nung Women Welfare Organisation (WWO) telen nung tongti tezülur Pooja Sonam Natung-i, Jeroni Tawo ya 2013 küm kibong aküm saka taoba ita (May) balaogo, ta ashi.
Taküm küm tetenzülen Jeroni-i la aliba yimtak nungi arem min tulu ajanga tetsüng agi jaja oa deputy director office nung la balatsü atema teyari meshi.
La ya 2008 küm la arishi küm 5 asüba mapang nungi iba khuret yagi kangshia aru. Lar tsüraburtemi la ya la dang nungi kangasa tambu ka den kibong kümdaktsütsü telemtetba agi, ta Natung-i ashi.
Tebu, Taru Tawo-i arishi küm 20 dak tema tain, Taling Pinche dang nungi la den kibong kümdaktsütsü tangatettep nung sen meshia agi aser tena 2013 küm kibong kümdaktsü.
Jeroni Tawo-i kanga tasü itta telemtetba agiba ajanga WWO kanga ajungmeso. WWO yagi East Kameng district nung yimya masüba inyakyim aser tanur asüba mapang kibong kümdaktsüba inyakyim nokdanger.
Yaküm WWO-i sentong ka ayongzüka tanur asüba mapang kibong kümdaktsüba osang kar danga lira parnok dang ashi nung ajungtsü ta tayongzükba agütsü.
Natung-i, arishi küm 13 tetsür ya May 31, 2016 nü nisung ajak mejanga aliba mapang jena ao, ta ashi.
Iba tebilemtsü ya ICDS cell nung benok aser parnoki WWO aser East Kameng Social Cultural Welfare Organisation den angatetteper iba tetsür kümzüktsü bangjemtep.
WWO-i anir iba tatalokba nung olemtep akaba mapang ICDS CDPO Dorjee Khandu Thungon-a dena liasü.
Iba tetsür kinungbo Taling Pinche-ia pa kinungtsüi taginüba angateta tena balatsü mulung.
Jeroni aser Pinche naprong ya Puroik kin nungi lir. Balaba atema temenokji sen 1,12,500 agir ajisüaka Pinche-i iba sen magi.
Pai telemtetba tajung agiba atema district administration-i pa nem sen 40,000 agütsü.
Natung-i, tanur asüba mapang kibong kümdaktsüba osang ya mapang shia yimtak kar nungi angashir. Jila tem nungbo joko iba yimya mamshir,” ta ashi.