AP nung Ayurveda Medical College atema Centre-i senotsü agütsütsü nangzük

Itanagar, September 02 (Agencies): Arunachal Pradesh nung Lohit district kübok Tezu jila nung yipden 50 aiba Ayurveda Medical College aser Hospital lapoktsü asoshi Centre-i sen teyari agütsütsü nangzükogo.

State Health & Family Welfare Minister Rajesh Tacho-i AYUSH nung Union Minister of State (Independent) Shripad Yasso Naik den New Delhi nung oa ajurutepba mapang Tacho-i state nung mozü yanglutetba süngolio aser süngtonglidong aika aliba kümzüka ayutsü asoshi college ka lapoktsüla, ta metetdaktsüba mapang iba tenangzükba agüja liasü.

Tacho-i ministry dang mozü junga shisadanga aser benteta amshitettsü asoshi AYUSH directorate balaka National AYUSH Mission anasa tesem ka latettsü nung ajungtsü ta ashiba, tanü ketdangser ka ajanga metetdaktsü.

Iba mapang Naik-i state minister dang, college yanglutsü atema Land Possession Certificate (LPC) nguli aser state sorkaria ibaji atemaji sen crore 2 lemzüktsüli Centre-i tekaratiba nung senotsü ajak agütsütsü, ta shiogo.

Tacho-isa health department (research) secretary Soumya Swaminathan dena ajurutepa Centre-i Model Rural Health Research Unit (MRHRU) ka nung ‘viral diagnostic lab’ ka lapoktsütsü nangzükba indang senotsü tekaratiba nung agüjang, ta shiogo aser iba den külemi Arunachal Pradesh nung Health research terenlok atema sen crore 5 asüngdangogo.

You must be logged in to post a comment Login