AP nung Kalikho Pul CM tasenba shimogo

Itanagar, Dec. 17 (Agencies): Arunachal Pradesh nung opposition BJP aser pei party anema noktaker Congress MLA tem longjemer Nabam Tuki-i aniba Congress sorkar dang melung malemba sayua Congress MLA ka chief minister shimogo.
Community Hall nung assembly ayonga Speaker, Nabam Rebia anendaktsüba sülen anogo ka lir opposition aser Congress MLA tem Itanagar nung aliba hotel conference hall ka nung Mongolbar nü senden ayonga agiogo.
Brihostibar nü BJP MLA 11 aser Independent züngsem anati party anema Congress lenir Deputy Speaker T Norbu Thongdok densema sorkar dang melung melemtetba sayugogo.
Züngsem 60 aliba House nung Congress MLA 20 densema züngsem 33-i Congress MLA Kalikho Pul chief minister tasenba shimogo.
Speaker tetuyuba nung district ketdangsertemi Bodhbar nü nungi Assembly telungtet shibangogo, iba sülen MLA temi Angh, J P Rajkhowa den asüngdangteper Naharlagun nung aliba hotel conference hall kati belena senden agi.
Thongdok-i aniba senden nung Chief Minister Nabam Tuki aser pa pusemer MLA 26 meliaka züngsem 33 jagi voice vote agitepba sülen Thongdok-i Pul ji House lenir ta sangdongba den külemi kobi melii Angh-i chief minister tasenba aser par minister tem tenangzükba agitsü tuyutsü, ta ashi.
Tuki-i Tir Pranab aser PM Modi dangi shidi zülu
Ano külen tanü chief minister Tuki-i Tir Pranab Mukherjee aser Ato kilonser Narendra Modi na dang shidi balala ajanga, state yimtenren tensa nung tiyongtsüi aitdaktsüner, ta mepishiogo.
Tuki-i Tir aser Ato kilonser dang, Angh-i sorkar dang masüngdangi pasasa Assembly senden ayongbaji temzüng dak mapet, ta ashi. “Linük Temzüng Arrla 174 nung, Angh-i Chief Minister aser par Council of Ministers den asüngdangteper ang Legislative Assembly senden ayongtettsü. Iba den mepeti Angh-i Arrla 175(2) tashi ajanga senden ayongtsü atema osang agütsü,” ta Tuki-i shidi nungji shia lir.
“Arrla 175(2) kübok osangji Bill ka atema dang aser House züngsem bangzüng ka atema masü ta nenoki meteta lir. Temzüng aser lateta aliba inyakyim alema inyaker Deputy Speaker den MLA kari Angh dang nungi temelaba agia temzüng alema badminton court ka nung senden ayonga agia Speaker agientsü atema bangzüng ka agizüka ayu,” ta shidi nung shia lir.
“Iba ya democracy tepsetba den külemi democratic yimya nung shimba sorkar alema inyakba lir aser linük Temzüng nung aliba ozüngtem den mapet. Linük asoshi aser Temzüng nung alibatem wazüka ayutsü asoshi iba onük nung tiyongtsü aittsü ni nü dang mepishir,” ta Tuki-isa shidi ajanga mepishiogo.