AP nung ki 73 tashi tzü agi ponger ogo

Itanagar, September 8 (Agencies): Arunachal Pradesh nung tzünglu maneni aluba ajanga tzümetsüng adoka yimtsüng ana nung ki 73 tashi ponger ao aser ibaji ajanga kibong 103 dak amshiogo.
Dibang Valley district nung Anpum yimtak tzü bendenba tank ka aser Loklung yimtak alu lenmang nung aliba apu tesangzüla ka ta raksaba den kümlemi item ki ponger oa liasü, ta Paglam Circle Officer Tatling Pertin-i metetdaktsüogo.
“Lendong agi tangshir alirtem jenoktsü asoshi Anpum School moapu nung tejenokdak ki yanglutsüogo. Tzüji joko terabo ajema kümdar saka tzü agi ponger aotsü tsübuba agi yimtaklirtemi parnok aliba ki bensadar,” ta Pertin-i ashi.
Lendong agi amshir alirtem nem teyari agütsütsü asoshi district ketdangsertemi Dambuk nung aliba ADC headquarter nung jang bag 94 den nüngdakba mozütem agutsüogo, ta pai ashi.
West Siang district nungi osang kar ajanga ashiba agi, tzünglu maneni aluba ajanga Yomgo ayong kanga lendong keta metsüngbanga atugo. Iba den külemi Liromoba tesem nunga tzümetsüng agi kanga timtem agütsür.
Kambu yimtak tzümetsüng agi tsüklutem meshimeshia samatsüogo aser ki 52 dak tema iba lendong agi amshia lir.
Liromoba constituency kübok nütsüngyongsük timba alibaji Kambu yimtak lir saka ano tang tashi gari lenmang mali.
Iba tesem nung MLA, Nyamar Karbak den ADC Niken Lollen aser CO Sara Borang, EE WRD Tadam Kamcham nungeri Deobar nü Kambu yimtsüngi tetsüng agi oa tzümetsüng agi raksatsüba asadangogo.