AP nung metzü agi anüngba olulu prok

Hyderabad, November 12 (Agencies): Tang linük nung bank tem aser ATMs nung mesemi nisung nungtepba mapang ka nung Andhra Pradesh aser Telangana na nungbo metzü agi anüngba olulu prokba ajanga nisungtem metzü alitsü atema dokantem nung kanga nungtepa liasü.
Guntur, Vijayawada nungbo ghonda ishika tsüngda metzü seret 20,000 ayok aser tanep 10:00 ako nungbo metzü ajak yokmar liasü. Kibong aika nung kinüngburtem sen 500 aser 1000 note tejen melentsü atema ATMs aser bank nung tarensena nokdakdang kinüngtsürtem metzü alitsü atema dokantem nung nungtepa liasü.
Iba maongka agia dokan kibur karibo metzü seret ka nung sen 200 tashi agi ayok, ta police osang ka ajanga ashi.
Ano Telangana nunga Sangareddy aser Hyderabad nung item ama kasa tatalokba liasü.
Saifabad, Indiranagar, Devarakonda, Krishna Nagar densema tesem aika nung metzü alitsü atema nisungtem tarensena nokdak, aser parnok nisung shia nem metzü seret 5 nungi 10 tashi dang agütsü.
Ano Uttar Pradesh nunga kasa olulu prokba atema state sorkari ketdangsertem dang olulu prokertem bushia temerenshi agujang, ta tetuyuba agutsüogo.