AP nung pungunü buba helicopter bushir

Itanagar, August 08 (Agencies): Tawa Arunachal Pradesh, Tirap district nung Pawan Hans helicopter ka nung nisung asem mener samaba sülen tanü agi anogo pongububa bushiogo.
Army aser Indian Air Force meyong M-17, A1-30 aser Chetak ka densema helicopter pongu amshia tanüa samaba helicopter ji anünglen nungi bushiogo, iba den külemi Army, IRB, state police aser nüburtemi ali nung tayimtsüji bushiogo saka tanü-a amajok nung tembang, ta state civil aviation secretary, B M Mishra-i ashi.
“Iba anogo nung helicopter angurtemi ashiba o nung ajemdaker onoki akokba tashi agi mera ajak agia helicopter ji bushidagi. Onoki akokba tashi agi merangaka tang tashi nungbo onoki takok mongui lir,” ta Mishra-isa shisem.
Tayimtsüji Tirap district kübok Sanliam aser Dadam yimtsüng na tsüngda arem min nung tongtibangsüa bushidagi.
Mongolbar anepdang 10:45 ako meta state meyong Pawan Hans helicopter nungji Tirap Deputy Commissioner Kamlesh Kumar Joshi den pilot ana- Captain M S Brar aser Captain Rajeev Hoskote nunger mener Tirap district, Khonsa nungi apusoa liasü.
Iba tatalokba bushisüngdangtsü atema Director General of Civil Aviation-i tuyuogo, aser Pawan Hans ketdangsertemia New Delhi aser Guwahati na nungi bushisüngdangtsü atema team yokogo.