AP nung Tawang tesemlen anentsüh agi nisung 16 asü

Itanagar, April 22 (Agencies) : Arunachal Pradesh nung Tawang tesemlen Hokolbarnü anentsüh tesashi aluba ajanga tajemba agi nisung 16 süogo.
Iba anentsüh ya Tawang kübok Phamla yimtsüng nung atalok.
Anentsüh aluba osang angashia National Disaster Response Force (NDRF) telok ka iba tesemi kanga ilonga ao.
“Iba anentsüh nungi nisung tasümang 15 agitetogo. Iba lendong ya Hokolbar nikongdang 2:30 ako meta atalok. Ketdangsertemia anentsüh agi anenbanger alirtem bushiba nung yaritepdar,” ta ketdangser tain kati IANS osangbenertem dang ashi.
Hopta junga state nung tzünglu maneni aluba ajanga tanü anentsüh aluba, Phamla yim ya China arrtsü anasa lir. Anentsüh aluba dang masü saka tzünglu tanen makai aluba ajanga state tesem aika nung tzü mobanga atsünger tzümetsüng aru ama lir, ta ketdangsertemi ashi.
Anentsü aluba mapang ayanger parnok nisung 17 mejanga aliba süki anenbanga indangjisa parnok 15 bo anenbang. Ana jentet saka kanga mejungi yiruba ajanga ano ka süatok, ta state ketdangsertemi ashi.
State Angh, J.P. Rajkhowa-i lendong nung asürtem kinunger nem sen lakh ka ka agütsütsü metetdaktsüogo.
Iba osang angashia Ato Kilonser Modi-ia asükhu lemsatepogo.