AP nung tesayurtem OSD meyoktsü

Itanagar, July 02 (Agencies) : Kaketshisatsü agütsüba tsütsü temulung agüja temelenshi adokdaktsü mechi nung Arunachal Chief Minister Kalikho Pul-i joko state nung tesayurtem tanga department nung mapa lemzüktsüba anentsü lemtetogo.
State school tem nung tesayur agi anüngba tebilemtsü ajema akümtsü atema, On Special Duty (OSD) yoka alir aser education department nung ketdangsüba mapa balala lemzükja alir tesayurtem ajak meyipa ajatsü, ta Honibarnü Itanagar nung official sangdong ka ajanga metetdaktsü.
Pul-i, department balala nung tanga mapa lemzükja aliba tesayurtem ajak school nunga oa sayutsü, ta ashi.
Chief minister-i iba telemtetba ya yashi Hokolbarnü New Delhi nung All Arunachal Pradesh SSA Teachers Association den senden ka amendang agi, ta kasa sangdong ajanga metetdaktsü.