APC-i AC Market Dimapur semdang

Dimapur, Aami/June 03, 2020 (TYO): Agri Production Commissioner, Kikheto Sema IAS, shiba Dimapur district COVID-19 incharge lir, pai June 3, 2020 nü Agri Expo site, Dimapur anasa tang teyangludak Organic Air Condition Market semdanga liasü.
Nagaland State Agricultural Marketing Board, (NSAMB) indang Chief Executive Officer, G.Ikuto Zhimomi aser Agri and Allied Sector nungi DHO Temsu Longkumer, DPO Land Resources, Akato Chishi, Deputy Director (NSAMB) nungertem densema ketdangsertem den sensaksemba mapang Kikheto-i, coronavirus tashidak wara mechi aluyimba tsütsü inyaksangshi manentsüla, ta ashi aser virus ya asenok den teti alitsü, ta nenshia ashi.
Tashidak wara mechi Naga nunger aika danga state tem nungi meyipa aruba aser ano arutsü aliba asoshi shisadanga jembiba mapang Sema-i ashiba agi, state nung industry tulu maliba mechi item lanurtem mapa inyaktsü asoshi aluyimba ya dang asütsü.
Aluyimba nung nükla tulu aliba indang lemsatepba mapang, asenoki alui meyipa aotsüla aser asen sasa züsentetba nung metaloka litettsüla, ta Khiketo Sema-i ashi.
Kasa mapang aluyimer nem metsü-jangnatsü peria agütsütsü nüngdaker. Danga state nungi sen talang agi quality tamajung aliba alitsü melena asen nüburtem dang metsü-jangnatsü tajung adokdaktsütsü ajungmesotsüla, ta pai ashi.
Tang tensa nung Agri and Allied sector ya kanga tongtipang lir, anungji APC ama inyaktsü totuyuba adokba den külemi ni iba mapa tasen inyaktsü tejangraba agi sünger liasü. Saka state sorkar tenüng nung COVID duty atema Dimapur-i yok, ajisüaka nisung meimchir tenzüktsü asoshi ya mapang tajung ka lir ta züngshir, ta Khiketo Sema-isa ashi.
Chief Executive officer, NSAMB, G.Ikuto Zhimomi-i ashiba agi, tang amenoktsü aliba market ya sen aazüktsü atema organic market aser Naga nunger organic chiyongtsütem ajungkettsü nükjidong nung tenzük.
Sen crore 8.264 agi renemtsü nükjidong nung iba Organic Air Condition Market ya yanglu tenzük. Mezüngbo iba AC market ya April ita semzüktsü sentong liasü, saka linük ajungalen shibangba ajanga Mumbai aser Delhi nungi osettsüse bener meyoktet, saka taküm kümsa iba market lapoktsü imlar, ta Zhimomi-i ashi.
Iba Organic AC market nung cold storage facility ana den 100 KVA back up generator aser 150 KV transformer lir. Iba tesem ajunga nung solar panel inoktsü, koba ajanga power 68 KVA adokdaktsütsü.