APCC-i Guwahati nung CBI office kima lungkak ait; Tir dangi shidi zülu

Guwahati, Mongputeni (October) 26 (Agencies): Assam Pradesh Congress Committee (APCC)-i Hokolbarnü India Tir Ram Nath Kovind dangi shidi ka zülu. Modi’er sorkari CBI Director Alok Verma mapa nungi anentsüba anema APCC-i shidiji zülu.
APCC-isa Guwahati nung aliba CBI office kima lungkak aitba sentong ka agi.
Prime Minister Narendra Modi tetuyuba nung ajemdaker CBI Director Alok Verma mapa nungi anentsü aser iba ya ozüng alema inyakba mapa ka lir, anungji pa tanaben shimoktsüla, ta Congress-i takhangba agütsü.
Linük nung bushisüngdang tentet tematiba CBI tashi samatsütsü aser raksatsütsü atema iba mapa ya inyak, ta parnokisa ashi.
India Tir-i iba atema tiyongtsüi aitsüla. Centre sorkari parnok kümzüktsü kechi nuing Rakesh Asthana shim saka pa CBI-i ochimashi ken o atema bushisüngdanger ta APCC lennirtemi ashi.
BJP sorkari Rafale ken o nungi jenbutsü atema meranger. Taoba union minister tem- Yashwant Sinha aser Arun Shourie den lawyer Prashant Bhushan nungeri Supreme Court nung Rafale atema ken oi benoka lir, ta parnokisa metetdaktsü.
CBI Director Alok Verma-i Rafale ken o atema bushisüngdang tenzükba atema Modi’er sorkar tsübudaktsü aser iba jagi parnoki pa mapa nungi anentsü, ta APCC-isa ashi.
CBI Director tanaben shimtsüla aser Prime Minister Narendra Modi-i iba atema tatok meshitsüla. Maneni, Rafale ken o bushisüngdangtsü atema CBI Director Alok Verma nem temeten agütsütsüla, ta parnokisa takhangba agütsü.
“PM Narendra Modi-i Rafale ken o bushisüngdang mesüdaktsütsü atema CBI Director Alok Verma mapa nungi anentsüba anema onoki lungkak aiter” ta Assam Pradesh Congress Committee (APCC) President Ripun Bora-i ashi.
Ano, Assam Legislative Assembly nung Opposition lennir Debabrata Saikia-ia “CBI Director Alok Verma mapa nungi anentsüba ya tim masü aser ozüng alema lir. Iba ya Centre-i Rafale ken o tsübuba atema inyakba mapa ka lir. Centre sorkari democratic inyakyim akhümtsübutsüla aser tanaben Verma CBI tanishir ama shimtsüla, kechiyong pa indang küm ana kümsük ano metembang lir” ta metetdaktsü.